Moskvami qaartartumeerisut tigusarineqarput

Moskvami mittarfiit ulapaarfiunersaanni januaarip 24-anni qaartartumeerinermut aattaqaqisumut atatillugu inuit pingasut tigusaapput.
februaarip 10-at 2011 06:22

Tigusarineqartut tassaapput imminut pilliutigaluni qaartartumeerisorineqartup 20-nik ukiullip Magomed Jevlojevip nukaa aleqaalu, Kaukasiami kunngiitsuuffimmi Ingusjetiameersut. Tusagassiuuteqarfik Itar-Tass taamatut allaaserisaqarpoq.

Nukarleq Akhmed 16-nik ukioqarpoq aleqaallu Fatima 22-nik ukioqarluni. Tigusarineqartut pingajuat qatanngutigiit illoqarfianneersuuvoq.

Itar-Tassimi allaaserisaq naapertorlugu taakkua qaartartulioqataasimapput.

Tusagassiuuteqarfik Interfax nalunaarpoq tigusarineqartut pingasut Moskvamukaanneqartut tassani killisiorneqassallutik.

Moskvami mittarfimmi qaartartumeerisoqarmalli paasiniaasut Kaukasusip avannarpasinnerusortaa pikitsitsiffiujuartoq paasiniaaffigisimavaat. Tamaani pikitsitsisut Ruslandimiit avissaarlutik immikkut islamisiortut naalagaaffiat pilersikkusuppaat.

Timmisartoqarfimmi Domodedovomi qaartartumeerinerup kingorna aamma islamisiortut pikitsitsisut siuttuat Doku Umarov akisussaasuulluni nalunaareerpoq.

Kaukasusip avannarpasinnerusortaani pikitsitsisut siornatigut Moskvami arlaleriarlutik saassussisareerput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq