Moskvami qaartartumeerineq arnat pileriarisimagunarpaat

Moskvami timmisartunut mittarfimmi Domodedovami ippassaq qaartartumeerinnittoqarmat inuit 35-t toqutaapput. Qaartartumeerisutut pasineqartut tassaapput uillarnerit qernertunik taaneqartartut.
Allattoq Jaaku Lyberth
januaarip 25-at 2011 13:27

Nutaarsiassaqartitsivik Ritzau taama allaaserisaqarpoq. Uillarnerit qernertunik taagorneqartut, de sorte enker, tassapput, upperisarsioqatigiit muslimiusut pikititsiniat Kaukasususip avannaani sorsunnermi, russinit toqutaasut uillarneri.

Moskvami mittarfimmi qaartartoq qaartinneqarmat, arnap imminut toquutigaluni qaartartumeersutut pasineqartup, pooqattaq nassatani ammarsimavaa qaartillugulu, isumannaallissanermik suliaqartoq atianik taaneqanngitsoq, russit naalagaaffiata nutaarsiassaqartitsivianut RIA Novosti-mut oqarsimavoq.

Arnat marluk imminnut toquutigalutik Moskvami qimuttuitsut nunap iluatigut ingerlaartartut unittarfianni Lubijankami qaartartumeerinnipput.

Uillarnerit marluk taakkua, kunngitsuuffimmi Dagestanimi islamisiortut pikititsisut uillarneraat, Dagestanip islamisiortut naalagaaffiattut namminersortunngornissaanut sorsuuteqartut.

Uillarnerit marluk Moskva-mi siorna qaartartumeerimmata inuit 39-t ajunaarput.

Moskvap timmisartunut mittarfiani ippassaq qaartartumeerisoqarmat, inuit 87-it ikiligaapput, taakkualu napparsimavinnut Moskvami Moskvallu eqqaaniittunut unitsinneqartut, russit peqqissutsimut ministereqarfiat nalunaaruteqarpoq.

Ikiligaasunit 32-t inuumerminnik uloriarnartorsiorput, allat pingasut ulorianartorsiorluinnartutut oqaatigineqarlutik.