Moskvami kiassuaarpoq
Upernarluni silap kiatsinnissaa nunatsinni maanna utaqqikatanneqalerunarpoq – qaquguuna kiatsinniartoq? Ilaat aperisarput.
Taakkununnga siunnersuutissaqarpugut: Moskvaliaannarit!
Ruslandimi illoqarfiit pingaarnersaanni ulluni makkunani aatsaat taama kiatsigaaq. Ippassaq 33 gradinik kiappoq ullullu tulleriit kingulliit ingerlaneranni 30 gradit sinnerlugit kiattarpoq, ukiullu taamaalinerani taama kiatsigisanngikkaluarpoq.
DR-ip Moskvami ilanngutassiortuata Poul F. Hansenip Moskvamiut qanoq kiassiortarnersut ima oqaluttuaraa:
- Sikut immiaaqqallu maani ulluni makkunani tunisaalluarput aammami silaannarissaatit tunisaalluarunaqaat, soorlu maani allaffeqarfitsinni ulluni kingullerni silaannarissaatit nutaat pingasut ikkussuunneqarput.
Silaannarissaatinik amerlanerusunik pisiortornerup ersersippaa, moskvamiut akissaqarnerulersimasut, taakkualu innaallagissamik atuingaatsiartuupput, taamaattumik silaannarissaatinik atuivallaarnissaq mianersoqqussutigineqareerpoq, tassa innaallagissiorfiup unittoortalernissaa ernummatigineqarmat.
Poul F. Hansen aperineqarami silaannarissaatinik atueqqusaanngikkaanni qanoq iliortariaqarnersoq, akivoq, imeq qangatut atortariaqartoq, soorlu illoqarfiup qeqqani inuit tissaluttulianit kuuffigitittut politiinit inerterneqanngillat, taseqqani tatsinilu inuit nalunnguffapput. Tamannali ulorianaatsuinnaanngilaq, soorlu inuit aqqaneq-marluk sapaatip-akunnerani kingullermi ipillutik ajunaarput, inuillu 26-t ipillutik maajip aallartinneranit ajunaarput. Imaanngilaq Moskvamiut nalunneq nalummata. Tassami qaatusimatillutik nalunnguarsinnaagaluarput, kisianni amerlaqisut baajatoqqaarlutik imaluunniit vodkatoqqaarlutik nalunnguartarput, taamalu ipillutik ajunaartarlutik. Moskvaannarmi inuit 3-400-t ipillutik aasap ingerlanerinnaani ajunaartarput, Poul F. Hansen naggasiivoq.
Nunatsinni kiatsinneq ajulernera immaqa iluariinnartariaqarparput.
