Moskvami 38-t ajunaarput 100 sinneqartut aqqunartiterlutik
Arnalli taakku marluk kisimiissimanngillat. Arnat allat marluk angullu ingerlaqatigisimagaat, qimuttuitsuniit nakkutiginnilluni assilisanik isiginnaarnikkut Ruslandimi politiit paasivaat. Nutaarsiassaqartitsivimmut Interfactsimut tusarfiit taama oqarput.
Pisooqataasut nassaariniarlugit assit politiit tamanut saqqummiunniaraat nutaarsiassaqartitsivimmi allaaserineqarpoq. Ruslandimilu qunutitsilluni perulluliortoqaqattaalernissaa maanna ernummatigineqalerpoq. Arnat marluk Kaukasusimeersut qaartartumeerisimagunarput.
Ruslandimi illoqarfinni ungasinngitsukkut qaartartumeerisoqarnissaa tjetjeniamiut pikitsitsisartut pisortaata qaammat kingulleq aarlerisaarutigaa. - Sakkutuutta suliaat Ruslandimut tamarmut siaruarneqassamaarput. Sorsuunneq Ruslandimi illoqarfinnut anngutissaaq, qoqassiisarlutik sorsuttartorpassuit, Kaukasusimi kunngiitsuuffinni najugallit, pisortaat, Duko Umanov, taamani oqarpoq. Qoqassiisarlutik sorsuttartut tamarmik Tjetjeniami naggueqarput, namminersulerniat sulinerat sequminniarlugu russit tamaani marloriarlutik sakkortuumik sorsussimapput.
Qimuttuitsut sukkasuuliat Moskvap Skt. Petersborgillu akornatigoortartut siorna novembarimi qaartartumeerfigineqarnerannik sorsunnerit kinguneqarput. Inuit 26-t taamani toqutaapput hornorujunillu amerlanerit aqqunartiterlutik.