Moses Olsen: - Naqqaniit aallarteqqaartariaqarpoq

Namminersornerullutik Oqartussani Naalakkersuisoqarfinni pisortat arfineq-marluk kalaallisut danskisullu oqaaseqartussaanerat Siumukkunnik aallarneeqataasup naalakkersuisunullu ilaasortaasimasup Moses Olsenip pissusissamisoorsorinngilaa.
decembarip 14-at 2007 17:10

Taanna isumaqarpoq danskit allaffissoriaasit assiliinnarlugu nunatsinni atugaasoq naqqaniit allanngorteqqaartariaqartoq.

- Uagut kalaaliugatta kalaalinngorsarneqarsinnaanngilagut, kalaalinngorsagassarlu tassaavoq aqutseriaaseq nunatsinnit aallaavilik tunngavilillu, Moses Olsen oqarpoq. Inuiaallu ikittunnguunerat erseqqissaatigaa taamatuttaaq nunatsinni ilinniarsimasut amerlannginnerat erseqqissaatigalugu.

- Tamanna imaaliallaannaq anguneq ajornakusuussasoraara, tassami qullerpaartat kalaallinik inuttaqaleraluarpataluunniit tullersorteqartuassapput qallunaanik suliassamut ilisimasaqarluartunik kvalifikationeqartunik. Taamaattumik Naalakkersuisut siunertaa tassa administrationip qumartinniarsarinissaa allanngornavianngilaq, oqarpoq.

Mosen Olsenip ilanngullugu eqqaavaa naalakkersuisut soraarsitsisoqannginnissaanik oqaaseqarsimanerat.

- Kalaaleq kinannguugaluarnersoq qullerpaartanngortikkaluarunikkuluunniit taava tullii tamarmik qallunaajussapput, taava administrationimut akissaajaatit taamaalillutik milliartornavianngillat, Moses Olsen oqarpoq.

Taassuma taama oqarnera Naalakkersuisut siulittaasuata Hans Enoksenip illuatungilerpaa.

- 1979-mi Mosesikkut siuttunngoramik taamanili aallartinniarsarilerpaat, uggornaraluartumillu annerusumik aallartinnagu oqaasiinnaatippaat. Taava qaqugu kinguarteqqikkutsigu qaqugu aallarteqqittoqassagami? Hans Enoksen oqarpoq. Taassuma naatsorsuutiginnginnerarpaa massakkut kinguartinneqarpat aallartinneqaqqinnissaa.

- Taamaalillunilu kalaallit isiginnaartuinnanngoqqissapput, oqarpoq. Erseqqissaavorlu kalaallit qullersatut sulisinnaarnerat apeqquserneqarsinnaanngilluinnartoq.

Hans Enoksen aperaarput anguniagaq tassaasoq kalaallisut danskisullu oqaaseqartuunissaq, namminerlu ataasiinnarmik aamma oqaaseqartuunera illuinnaasiunnginnersoq.

- Danskit ataasiinnarmik oqaasillit apeqquserneqanngisaannarput, kisianni kalaallit ataasiinnarmik oqaasillit tamatigut kalaaleqatiminnik apeqqusersorneqartarput aamma tusagassiortuninngaanniit, Hans Enoksen puffaammerluni oqarpoq.

Naalakkersuisut siulittaasuat qallunaatut oqaatsinik ilinniassamaarnersoq aperigatsinni erseqqissaavoq, ataasiinnarmik oqaaseqarluni qinigaagami qinersisartut qallunaatut pinngitsoorani oqalussasoq pinngitsaalisimanngikkaanni.