Moses Olsen: Malittarisassat allanngornerat iluaqutaanavanngilaq

Siumup ataatsimeersuarnerani qaangiuteqqammersumi malittarisassat allanngortinneqarnerani immikkoortortaqarfinni ilaasortaqassuseq naapertorlugu ataatsimeersuarnernut peqataasoqartalissalluni. Immikkoortortaqarfiit tamarmik ataatsimik peqataatitaqarsinnaapput, immikkoortortaqarfilli 50-it 100-llu akornanni ilaasortaqaruni marlunnik peqataatitaqarsinnaalluni, 100-t sinnerlugit ilaasortaqaraanni pingasunik peqataatitarsinnaavoq.

Partiimi pilersitseqataasup Moses Olsen-ip nalilerpaa allannguineq sunniuteqangaarnavianngitsoq nunaqarfiit amerlaqimmata, peqataatitaallu kisitsisinik allanngortitsinavianngitsut.

- Ullumikkutut nunaqarfiit amerlatigitillugit, ataasiinnarmilluunniit ilaatitaqaraluarunik suli nukittuukasittut inissisimapput, Moses Olsen oqarpoq.

Moses Olsen isumaqanngilaq partiimi avissaartuuttoqartoq.

- Amerlanerussuteqartut isummernerat naalagaralugu pinngitsoorani ingerlasussaavoq, ajuallattoqartarpoq nuannaartoqartarpoq, uggualaarnerilli qaangiukkaangata Siumup ataatsimoornera maannamut allanngorneq ajorpoq, Moses Olsen oqarpoq.