Moses Olsen: Demokratii equtinneqarpoq

Nunatsinni demokratii tunaartaralugu ingerlatsineq maanna equlluinnarpoq, naalakkersuinikkut ajornartorsiortoqarneratigut, tamannalu qinersinikkut taamaallat aaqqinneqarsinnaavoq, politikeri Namminersornerulernissarput anguniarlugu sulissutiginneqataasoq kingornalu qinikkatut naalakkersuinikkut ukiorpassuarni suleqataasimasoq, Moses Olsen taama naliliivoq.

Naalakkersuinikkut pisut kingulliit pillugit ima oqarpoq:

- Naalakkersuinikkut manna killiffiusoq tujorminartutut naatsumik taasinnaavara, naalakkersuisunngortitsisarnikkut periusissat ajunngitsumik torersumillu ilusilersukkagut pffissami kingullermi naammattuuinerluttaarfiulernerat tujorminartuuvoq.

Naalakkersuisut siulittaasuata arlalinnik oqartussaafeqalernera kusanaatsuusoq Moses Olsen isumaqarnerarpoq:

- Inummut ataatsimut akisussaaffippassuit qaleriiaaginnartut inissitsiterneqarnerat kusananngilaq. Siamasinnerusumik politikerit innuttaasullu akisussaassuseqarnerat qumartinneqartutullusooq immat.

Demokratiip iluaqutiginavianngilaa oqartusaaffiit inummut ataatsimuut pippata atorfillit aqortuussaassuseqarnerulissammata Moses Olsen oqarpoq.

Inuit Ataqatigiit naalkkersuisunngortitsinissat eqqarsaatigalugit aalajangeeqataasarnissamik piumasaat pissusissaamissoorsorinngilaa:

-Isumaqatigiissutaareersimasut malillugit partiip naalakkersuisooqataasup nammineerluni kikkut naalakkersuisuutissallugit aalajangertussaavaa.

Tamanna akuersaarneqarsinnaanngilaq tatiginninnginnermut takussutissaammat.

Moses Olsen isumaqarpoq pisut kingulliit takutikkaat Siumut partiitut pappiaqqani sallersaagaluartoq ukiuni kingullernisut nukittutigiunnaartoq ulluinnarni pissaanerpiaq Inuit ataqatigiinniittoq takuneqarsinnaammat.

Moses Olsen tamanna pillugu isumaqarpoq naalakkersuinikkut itinerusumik isumaqatigiinngittoqarpat qinersineq aqqutigalugu ajornartorsutinik qaangiiniartoqartariaqartoq.