Morten Olsen 2012-imi sungiusaasuujunnaassaaq

Tusagassiortunik ullumi katersortitsinermi tamanna ilisimatitsissutigaa.

- Siusinaarlunga ilisimatitsivunga, Danmarkimimi Arsaattartut Kattuffissuata, DBU-p, sungiusaasussamik pikkorissumik nassaarnissaa uanga pingaartikkakku, Morten Olsen oqarpoq.

- Sungiusaasoq, immaqa suliffeqareersoq, DBU-p tuiatigut toorlugu ima oqarfigisinnaanerussavaa: "Sungiusaasutut atorfik piffissami uani inuttaqassanngilaq". Sungiusaasumik pikkorissumik nassaarnissaq qallunaanut kattuffimmullu pingaaruteqarpoq, Morten Olsen nassuiaavoq.

DBU-mut isumaqatigiissutini Morten Olsenip januaarimi ukioq-manna sivitsorpaa, nunanut allanut unammisartut sungiusaasuat Sydafrikami nunarsuaq tamakkerlugu pissartanngorniuttoreerpat tunuassanersoq sivisuumik eqqarsaatigereerlugu. Ingerlaqqinnissaminulli sapiutinnginnami taamaaliorpoq, EM-imullu anngunniunnerni sungiusaalluni, qallunaat pingasoriarlutik unammineranni arfinilinnik pointinnaffianni.

EM-imut anngunnissaq maanna tullinnguuppoq. Taartissannut kusanartumik tunniusserusuppunga, arsaattartut pikkorissut aamma kingornutsikkusuppakka, Morten Olsen oqarpoq.

61-inik ukiulik Morten Olsen nunanut allanut unammisartunut 2000-imi aasakkut sungiusaasunngorpoq, Bo Johansson taarserlugu.