Morten Bødskov danskit inatsisinik atuutsitsinermut ministeriattut tunuarpoq
Ataatsimiititaliap Christianiamut pulaarnissaanik taamaatitsiinnarnermut atatillugu inatsiseqarneq pillugu ataatsimiititaliamut eqqunngitsumik paasissutissiillunilu salluliorsimanini Morten Bødskovip ministeritut tunuassutigaa. Bødskov talerperlernit iluarineqarani qangali peersinniarneqalerpoq, Enhedslistenilli ministerimik tapersiiumajunnaarneratigut tunuaannartariaqalerpoq.
Allattoq Peter Troelsen, Simon Uldum
decembarip 10-at 2013 18:31
Morten Bødskov Kalaallit Nunaannut tunngatillugu iliuuseqarpallaarsimanngilaq. Eqqartuussiveqarnerup iluarsartuuteqqinneqarnissaa, parnaarussiviit pinerluuteqarsimanillu isumaginnittoqarfik ajornartorsiorfiusimaqisoq politikkikkut akisussaaffigai. Aammattaaq Bødskov tassaavoq suliniutinut angisuunut tunngatillugu allamiunik suliartortitsinissamut atatillugu danskit tungaannit akisussaasuusoq.
-Folketingimi amerlanerussuteqartut ministeritut tatigisinnaajunnaarpannga, tamanna kinguneqartillugu tunuartariaqarpunga. Inatsisinik atuutsitsinermut ministeriunera nuannareqaara ingerlaannarusukkaluarlungalu. Maannali tunuarpunga allallu taarsissavaanga, inatsisinik atuutsitsinermut ministeritut tunuartoq Morten Bødskov oqarpoq.
