Moriusaq akunniffittut pingaartuuvoq

Moriusap maanna marluinnarnik inoqalersimanera pillugu Moriusap nunaqarfittut siunissaa naalakkersuisunut ilaasortap Jens B. Frederiksenip aamma Qaasuitsup Kommuniani borgmesterip Jess Svanep oqaloqatigiissutigisalersimavaat .

- Moriusap matuneqarnissaa naalakkersuisoqarfimmiit aalajangiiffigineqarnialersaalersoq paasinarluarpoq, kisianni nalilersuinermi isumalioqqutissanut ilannguttariaqarsoraara aasaanerani umiatsiaannarmik avannamukartunut Moriusap akunniffiusarnera, Hans Berthelsen oqarpoq.

Savissivik Qimusseriarsuarmiimmat nunakkut angalasut Qaanaamukarniartillutik 800 kilometerit tikillugit angalasariaqartarput, taamaattumillu Moriusaq Pituffimmit 30 kilometerinik kujasinnerusumiittoq akunniffigissallugu pisariaqartittarpaat.

- Aasaanerani umiatsiaannarmik Savissivimmit avannamukartut aamma aquuteralannut orsussarsiniarfittut taquassarsiniarfittullu Moriusaq atortarpaat, taamatullu aamma avannaanit kujammukaartut, oqarpoq.

Ukiukkullu qimussimik angalasut Moriusaq akunniffigisarpaat Qaanaarmi Kangerlussuup paavaniippoq, avannaatungaaniilluni.

- Moriusaq qimussimik umiatsiamillu angalasunut pingaaruteqarpoq, ukiuuppat aasaappallu, pingaartumik sila ajortillugu akunniffissaqqimmat, Hans Berthelsen nangippoq.

Savissivimmioq neriuppoq Moriusaq matussappat allatut ittumik angalasut orsussarsiniarfissaminnik taquassarsiniarfissaminnillu periarfissarsiuunneqartariaqarlutik

- Immaqa Pituffik immikkut isumaqatigiissuteqarfigineqarsinnaavoq, Hans Berthelsen naggasiivoq.

Ineqarnermut, Attaveqarnermut Angallannermullu Naalakkersuisup Jens B. Frederiksenip ippassaq oqaatigaa, Naalakkersuisut Moriusaq pillugu inassuteqaatissaat Naalakkersuisoqatigiit sisamanngorpat aggutsip ulluisa arfernanni ataatsimiissutigissagaat.