Montrealimi ukioq manna nillertiaangaatsiarlunilu ukiuliaaqaaq, tamannalu angerlarsimaffeqanngitsunut eqquinerlussaaq.

Politiit namminerlu kajumissutsiminnik suliaqartut angerlarsimaffeqanngitsunut alaatsinaapput, silalli nillernera 20-t qaanginngikkuniuk angerlarsimaffeqanngitsut tiguneqarneq ajorlutik.

Montrealip qeqqani Cabot Square-imik taaguuteqartumik siorna decembarip tungaanut qimarngueqarsimagaluarpoq, naggueqatigiillu inuit tassaneerrattaraluarlutik.

AAMMA ATUARUK Canadami nunap inoqqaavi issinnerujussuanit eqqorneqarput

Qimarnguiulli sumiiffigisaani inissianik kusanarluinnartunik sanaartortoqartussanngornera pissutigalugu ingutserneqarsimavoq. Naggueqatigiit inuit amerlanerusut taamaalillutik aqqusiniinnarmi najugaqalerlutik.

Tamannalu kingunipiloqartoq, canadamiut nutaarsiassaqartitsiviisa septembarimi allaaseraat. Naggueqatigiit inuit indianerillu ukiup affaani kingullerni 14-it toqupput. Taakku qimarnguimmi maanna ingutserneqarsimasumi siusinnerusukkut najugaqarsimagaluarput.

Taakkunannga arfineq pingasut naggueqatigiinnit inunnit arnaapput. Taakku nakuusernermik, kinguaassiutitigut naapertuilluanngitsuliornermik, aanngajaarniutinik atornerluinermik nillerneranillu nalaataqarsimapput.

Montrealimi naggueqatigiit inuit angerlarsimaffeqanngitsut 400-t missaanniissangatinneqarput.