Montrealimi Inuit angerlarsimaffeqanngitsut

Qasserpiaaneri ilisimaneqanngikkaluarput, ilimagineqarlunili naggueqatigiit Inuit Montrealimi angerlarsimaffeqanngitsut 200-t imaluunniit 300-t akornanniissasut.

Taakku amerlanersaat Nunavimmeersuupput. Naggueqatigiit Inuit taakku ilaat Montrealimi napparsimmaviliartitaasarput angerlaqqittaratilli, imaluunniit illoqarfissuarmiumik aappaqalerlutik illoqarfissuarmut tassunga nuuttarput, tassaniitillutilli qimanneqartarlutik.

Ajornartorsiutaavorli taakku ullormi unnuamilu oqqiffissaqartannginnerat.

Angerlarsimaffeqanngitsut ornittagaat, taaguutilik Open Door, tassa matu ammasoq, maanna ukiuni 25-nngortuni angerlarsimaffeqanngitsunik sullissiviuvoq.

David Chapman, ornittakkap taassuma ittuata tulliata Radioaviisimut oqaatigaa, naggueqatigiit Inuit angerlarsimaffeqanngitsut amerliartuinnartut.

Angerlarsimaffeqanngitsut ornittagaat Open Door Makivimmit tapiiffigineqartarpoq. Angerlarsimaffeqanngitsut ornittagaat aamma nammineerluni aningaasanik katersuiniartarpoq, taamaalillutimmi ullut tamaasa ullormut arlaleriarlutik nerisitsinissaminnut akissaqarsinnaasaramik.

Naggueqatigiit Inuit ornittakkamit ullut tamaasa nerisinneqartartut 150-it missaanniittut, David Chapmanip oqaatigaa.

Angerlarsimaffeqanngitsut ornittagaat Open Door, taamaallaat ullaakkorsiorfigineqarsinnaallunilu ulloqeqqasiorfigineqarsinnaavoq, tamatumalu kingorna naggueqatigiit Inuit angerlarsimaffeqanngitsut allami oqqiffissarsiortariaqartarlutik.

Ukiuunerani 20-nik imaluunniit 30-nik issittarpoq. Taamaattumik naggueqatigiit Inuit kissap anilaarfiini illorsuit portusuuliat killinginiittuni imaluunniit aningaasanut tigusisarfiit killingini ilorparsimanerni qaamaneqalaartuni sinittarput.

Naggueqatigiit Inuit amerlanersaat allamut nuuttaqattaartariaqartaramik unnuaanerani sinippiarneq ajorput.

Taamaattumik angerlarsimaffeqanngitsut ornittagaat Open Door-imut takkukkaangamik qasoqqasaqisut ullullu annersaani sinittartut David Chapmanip Radioaviisimut oqaatigaa.