Montenegromi taasinerit suli kisinneqarput
Montenegromi taasinerit tamarmik suli kisinneqanngillat namminersulivinniarlutilli suliniuteqartut ajugaanersiuleruttorput.
DR-ip tusagassiortuata Thomas Ubbesenip namminersulivinnisaq pillugu aperineqarami Montenegrop avannaanit ima akivoq
- Montenegromi nuna tamakkerlugu qinersinermi nakkutiginnittut siulittaasuat naapertorlugu Montenegro namminersulivissanersoq suli uppernarsineqanngilaq. Taasinerit 95 procentii maanna kisinneqareerput 25.000-t kisinneqarnissaat amigaatigineqarpoq. Taasinerit taakku paarnaarussivinniittut taasinerivaat maannangaarlu qanoq taakku taasisimassanersut eqqoriaruminaatsorujussuuvoq, Thomas Ubbesen oqarpoq.
Montenegromi taasisut 55 procentiisa namminersulivinnissaq akuersissutigisimassagaat EU-mit piumasarineqareerpoq. Namminersulivinnissaq itigartitsissutigineqassappat innuttaasut qanoq qisuariassanersut Thomas Ubbesenimut apeqqutigaarput, taanna ima akivoq:
- Innuttaasut qanoq qisuariassanersut oqaatigiuminaappoq, assersuutigalugu illoqarfiit pingaanersaanni unnuaq kisitsinerit inerneri siulliit pisortatigoortumik saqqummiunneqaannartut inuit angerlakaapput. Maannamullu suli takussaanngillat. Malunnartumik taasinerit tamarmik kisinneqarnissaat utaqqivaat. Namminersulivinniarlutik suliniteqartut siuttuata taasinerit tamarmik kisinneqareerpata aatsaat oqaaseqarniarluni nalunaaruteqareerpoq, Thomas Ubbesen taama naggasiivoq.
