Molybdæni pillugu innuttaasut ataatsimeeqatigineqassapput

Molybdænimik piiaasinnaanissamik akuersissut tunineqariarpat piiaaffik aappaagu ammarneqarsinnaassaaq.

Piiaaffimmi sanaartorneq ukiut pingasut ingerlaneranni naammassineqarsinnaassasoq, John Telling, aatsitassanut naalakkersuisoqarfimmeersoq, oqarpoq. Piiaaffiup saniatigut umiarsualiviliortoqassaaq, mittarfiliortoqassallunilu.

Molybdænimik suliarinniffiliortoqassaaq, 70 kilometeritullu takitigisumik aqqusinniortoqassalluni. Taassuma saniatigut sulisunut inissialiortoqassaaq.

Inuit 600-t missaat sanaartornerup nalaani sulisorineqassangatinneqarput, naammassippallu suliffissat ataavartut 500-t missaanniissallutik.

Sulisut sapinngisamik kalaaliunissaat Quadra Miningip pisussaaffigaa, sulisulli nunanit allaneersut aamma sulisorineqassapput.

Maskiinat innaallagissiorfillu uuliatortut dieselitortullu atorneqartariaqassapput. Taamaaliornikkut CO2 aniatitaq annertussaaq.

Naatsorsukkat takutippaat CO2 Kalaallit Nunaanni aniatinneqartoq 30-t aamma 35 procentit akornanni annertuseriassasoq.

Avatangiisit mingutsaaliorneqarnissaat pillugit naammassisassat arlaqaalupput.

Eqqakkat qanoq iliuuseqarfiginissaat taakkununnga ilaavoq, molybdænillu suliarineqarneranut atatillugu sinnikut qanoq iliuuseqarfigineqartussaallutik.

Timmissat eriagisassat aamma eqqarsaatigineqartariaqassapput, timmisartoqarfissaq timmissat pineqartut najugaqarfianni sananeqassammat.

Tamakku tamarmik naammassineqarpata aatsaat piiaanissamut akuersissut tunniunneqarsinnaassasoq, aatsitassanut naalakkersuisoqarfik ilisimatitsivoq.

Molybdænimik piiaanerup ukiuni 20-ni ingerlasinnaanissaa ilimagineqarpoq, aningaasallu kaaviiaartitat ukiumut 3,5 milliardi koruuniunissaat ilimagineqarluni.