Mogens Lykketoft: Danmarkip Kalaallit Nunaannut politikkia allangornavianngilaq

- Isumaqarpunga Kalaallit Nunaata Danmarkillu attaveqaqatigiinnerat qujanartumik Danmarkimi partiit isumaqatigiinnginnerannit aqunneqanngitsoq. Soorlu takuneqarsinnaasutut Namminersorneq pillugu ataatsimiititaliarsuarmi pisuussutit uumaatsut pineqalermata Frank Jensenip Socialdemokratiusup isumaqatigiissitsineq Kalaallit Nunaannut iluaqutaasussaq iluatsippaa, matumani naalakkersuisut partiivi ilanngullugit. Taamaallaat inuiaassutsiminnik pingaartitsisut Dansk Folkepartiimeersut allaanerusumik isummersorput. Tassa Kalaallit Nunaat Danmarkimi naalakkersuinikkut pissaaneqarniunnerit apeqqutaatinnagit ingerlaqqissinnaavoq, Mogens Lykketoft oqarpoq.

Apeqqutigineqarmat Socialdemokratit Foghip Kalaallit Nunaannut politikia ingerlateqqiinnassaneraat, Mogens Lykketoft akivoq, apeqqutini pingaarnerusutigut allanngortoqangaarnavianngitsoq. Tassami Anders Fogh-ip Kalaallit Nunaannut imaluunniit Savalimmiunut aaqqiagiinngissuteqarnissaq pinaveersaartuarsimavaa, tamannalu uagut aamma anguniassavarput. Maannami naalagaaffeqatigiit immikkoortuini pingasuusuni suleqatigiilluarnissamut periarfissaqarpugut.

Uannut atatillugu assigiinngitsorpassuarnik pissuteqarlunga Kalaallit Nunaat pitsaasunik misigissuseqarfigaara, neriuutigaaralu taamatut attaveqaqatigiinneq pitsaasoq ingerlaqqissasoq. Kalaallit soorunami qaqugu namminersulivinnissartik suliassallu suut tigussaneritik namminneerlutik aalajangiiffigissavaat, Mogens Lykketoft naggasiivoq.