Mobilip attaveqarfii nunap assinngorlugit saqqummersippaat
Oqarasuaatit angallattakkat illoqarfiup avataani sumi atorsinnaanersut innuttaasunit takuneqarsinnaaniassammat, TELE-POST sinerissamut atuuttumik nunap assinganik takussutissiorsimavoq.
TELE-POST-imit erseqqissarneqarpoq nunap assingani nalunaarsukkat ilaanni mobilit atorsinnaaneri nalunaarsorneqarsimagaluartut, sumiiffiit ilaanni atorsinnaanngimmata. Tamatumunngalu pissutsit assigiinngitsut pissutaasut oqaatigineqarpoq.
Nunat assiliani nalunaarsuutit naatsorsuutinik aallaaveqarput, GSM-it sumi atuussinnaanerinut naatsorsuusiornerit aallaavigalugit suliaallutik.
Mobilit nammineq najukkami qanittumi sumi atorsinnaanersut takorusukkaanni www.tele.gl -imi takuneqarsinnaapput.
TELE-POST-imit ilanngullugu erseqqissaatigineqarpoq, angalasunut isumannaallisaaneq pitsaanerpaaq maanna tassaammat VHF radio imaluunniit Iridium telefuuni.