Mobili atuarsinnaasoq

Periutsimik nutaamik nassaartoqarneratigut naqinnernik ilisarinnissinnaanngitsut oqinnerusumik atugassaqartitaasinnaalerput.

Naqinnernik ilisarinnissinnaanngitsoq sanaartornermik sulialik ilitsersuummik atuarsinnaanngikkuni assartuutiniluunniit aquttup assartugassat pappiarartaat atuarsinnaanngippagit taakkununnga neqeroorutitsialammik periarfissaqalersoq, nutaarsiassaqartitsivik ritzau allaatiginnippoq.

Mobilinut programi nutaaq nassaarineqarsimavoq, sunaluunniit atuarusutaq mobilip assiliissutitaanik assiligaanni taava allanneq taanna nipitalimmik atuarneqarpaluttussanngorlugu. Teknologimik taamaattumik nassaartuupput Københavnimi ilisimatuut.

- Naqinnernik ilisarinnissinnaanngitsut atuarsinnaasutuulli sukkatigisumik paasisaqarsinnaalerput, puigortooraluarunikkulu naqinnerit allassimasut assileqqiinnarneqarsinnaapput, peqatigiiffimmi 3F-imi siulittaasoq Poul Erik Skov Christensen oqarpoq nangipporlu:

- Ukiuni arlalippassuarni sorsuutigisimavarput naqinnernik ilisarinnissinnaanngitsut suliffeqarfinni ajornerusumik atugassaqartitaanerisa ajunnginnerulernissaat, taamaalillunilu aamma atuffarluttup atuffarissiartulernissaanut mobili aqqutigalugu periarfissinneqarsinnaalissaaq, Poul Erik Skov Christensen oqarpoq.

Taakku neriuutigaat mobili atorlugu periarfissiineq suliffeqarfinni pisariinnerulersitsiumaartoq.