MobilePay Nunatsinni siusinnerpaamik 2018-imi atuutilissasoq
Oqarasuaat angallattagaq atorlugu MobilePayikkut akiliisarneq Danmarkimi atugaagaluttuinnarpoq, periarfissarli taanna Nunatsinni suli atorneqarsinnaanngikkallarpoq.
MobilePayimik aaqqissuussinerup Danske Bankip ingerlataata oqarasuaatini arfinilinnik kisitsisitalinnik normulinni atorneqarsinnaannginnera tamatumunnga pissutaasoq, Sermitsiaq.AG taama allaaserisaqarpoq.
Oqarasuaat atorlugu akiliissutip Swippip BankNordikimit Grønlandsbankenimillu atorneqarunnaarneranit ukiup affaa qaangiutilerpoq MobilePayimullu nuuttoqartussaagaluarluni.
AAMMA ATUARUK GrønlandsBanken skifter Swipp ud med MobilePay
Akiliissulli Nunatsinni atorneqarsinnaasunngorlugu aningaaseriviit ineriartortinnianngikkallarlugu toqqarsimavaat, Grønlandsbankenimi ineriartortitsinermut pisortaq, René Sørensen taama oqarpoq.
- Aaqqiissutissaq Nunatsinni atorneqarsinnaasoq Mobilepayimut saqqummiupparput, ineriartortitsinissamullu nukiit suliassanut allanut immikkoortinneqareersimaneri pissutaagunarpoq. Aningaaseriviimmi Kalaallit Nunaanni Savalimmiunilu sullitaat aamma killeqarput.
Mobilepay Nunatsinni siusinnerpaamik 2018-ip qiteqqunnerani atorneqarsinnaalissasoq René Sørensenip ilimagalugu oqaatigaa.