MobilePay: Grønlandsbanken utaqqimaaqqaarallarniartoq

Danmarkimi aningaaseriviit 70-it oqarasuaat angallattagaq atorlugu akiliuteqartarnermut atugassiaq Swipp atorunnaarlugu Danske Bankip atugassiaa MobilePay atulerpaat. Aningaaseriviit ataasinngormat taama nalunaaruteqarput.
Assi © : Danske Bank
novembarip 15-at 2016 06:14

Swipp Grønlandsbankip sullitaanit inunnit ataasiakkaanit suliffeqarfinniillu atorneqarpoq. Taakkuli allannguutinik malugisaqassanngillat Swipp suli atuinnarallassammat, aningaaserivik taama ilisimatitsivoq.

- MobilePayimut tunngatillugu pissutsit inissivissornissaat utaqqimaarallarniarparput, aamma allannguuteqassappat sullitavut soorunami ilisimatikkumaarpagut, ineriartortitsinermut pisortaq, René Sørensen KNR-imut taama oqarpoq.

Aamma atuaruk Aningaaserivissuup Swipp atorunnaarlugu MobilePay atuinnaleraa

Swippip MobilePay sivisuumik unammillerniarsarigaluarpaa atuisuili amerlasimanatik. Aningaaserivissuullu Nordeap Swippimik atuiunnaarluni MobilePay atulermagu Swippip atorneruukkiartornissaa ilimagineqalerpoq.

Kingorna aamma Jyske Bankip atorunnaarpaa, aningaaseriviimmi allat Swippimik suleqatigiissuteqartut peqatigalugit nalunaarutigaa MobilePay siunissami atorneqalissasoq.