Mobiilinik arsaarneqarsinnaalerput

Italiami meeqqat atuarfiani atuartup, tiimeqarnerup nalaani mobiltelefoni atoruniu misilitsinnissaraluaminiit peersitaasinnaalerpoq.

Italiamiut meeqqat atuartut atuarnermi nalaanni mobiltelefoninik atuisarpallaaqimmata, Italiami ilinniartitaanermut ministeeriaqarfik inatsisinik sukaterivoq. Inatsisillu sukangaqisut ullumi atuutilerput, tassalu atuartoq tiimeqarnermi nalaani mobiltelefonini ikumatissimaguniuk, mobiltelefoniminik arsaaneqarnermi saniatigut, misilitsinnissaraluaniit peerneqarsinnaalerpoq.

Taamak sukangatigisumik inatsiseqalerneq pissuteqarpoq, atuartut akornanni mobiltelefoni atorlugu, atuaqatinik ajortisaaraluni malersuisarnerit, mobiltelefonillu atorlugit imminut qinngasaaruttarnerit meeqqat atuartut atorpallaaqimmassuk.

Italiami meeqqat sakkortuumik pissuseqarlutik, meeraqatiminnik annersaanerit mobiltelefonikkut immiuttarsimavaat, immiussallu internet-ikkut siarummartertarsimallugit. Mobiltelefonillu atorlugit taamatut sakkortuuliortarnerit unitsinniarlugit, atuartut taamatut atornerluisimasut sakkortuumik pillarneqarsinnaalerput.