Mittarfiup tallineqarnissaa naammagineqanngitsoq

Nuummi mittarfiup 1799 meterinut tallineqarsinnaanissaa ippassaq ammaaffigineqarpoq. Nuummi borgmesteriata Agnethe Davidsenip, Attaveqarnermullu naalakkersuisup Jens Napaattuup ippassaq ataatsimeeqatigiinneranni tamanna aalajangiunneqarpoq.

Tamannali Air Greenlandip tungaaninngaanniit naammagineqanngilaq.

Air Greenlandimi pisortaanerup, Flemming Knudsenip, ujartugaa tassaavoq angallannermut politikkimi ataasiinnarmik atlantikkoorutinik timmisartoqarfissuaqarnissaa.

Timmisartoqarfissuarlu taanna 1799 meterinit tannerungaatsiartariaqartoq Flemming Knudsen oqarpoq.

Timmisartoqarfissuaq Nuummiittariaqannginnera Flemming Knudsenip aamma oqariartuutigaa.

Assersuutigalugu taavaa Nuup mittarfiata silarlunnera pissutigalugu matusariaqartarnera. Agguaqatigiissillugu Nuup mittarfia ukiumut ullut 20-t matoqqasarpoq.

Nuummi mittarfiup tallineqarsinnaanissaa 800 million koruuninik naleqarnissaa Nuup Kommuneata naatsorsuutaaniippoq, 2009-milu tallineqarsinnaassaaq.