Mittarfiup suliarineqarnerani Kulusummut timmisartuussinissat allanngortinneqartut

Sapaammi ullumilu ataasinngornermi ilaasut 50-it apuunniarneqarput, kiisalu ilaasut 17-it ataasinngornermi nal. 12.00 angalanissanut pilersaarummik nassiussivigineqarlutik

Kinguaattoornernut Mittarfeqarfiit Kulusummi mittarfimmi pilersaarutaasumik suliaqarnerat peqqutaavoq. Mittarfimmi suliat kinguaattoorfiupput, sumiiffimmilu siallerujussuarnera pissutigalugu akimmisaartinneqarlutik.

Mittarfillu piffissap ilaani atorneqarsinnaasimanngilaq matoqqatinneqarsimallunilu.
Mittarfimmi iluarsaassinerit sukkanerusumik ingerlanissaat anguniarlugu Mittarfeqarfiit mittarfik 800 miiterimut naannerulersittariaqarsimagaat Mittarfeqarfiit Air Greenlandimut nalunaaruteqarput.

Mittarfeqarfinniit ilisimatitsissutigineqarpoq, mittarfimmi sulineq septembarip ulluisa 23-ata tungaanut ingerlaqqinnissaa naatsorsuutigineqartoq. Taamaattumik mittarfimmi sulineq aamma sapaatit akunneranni tulliuttumi Kulusummut Kulusummiillu angallannissamut pilersaarutini allannguinermik nassataqarsinnaavoq.