Mittarfiup allilerniarneqarnera Aqqaluk Lyngemit akerlilerneqarpoq
Mittarfik Stansted, Londonip ungataaniittoq, allisarneqalerpoq, ICC-llu nunatsinni peræsidentia Aqqaluk Lynge tusarniaanerup nalaani tassani oqalugiaqqammerpoq.
Stansted-ip mittarfia attartukkanut timmisartuussiffiunerusartoq Tuluit oqartussaasuinit allisarneqarniarpoq, ilaasut ukiumut 25 millioniusaraluariarlutik 35 millioninngornissaat anguniagaalluni.
Mittarfimmik allisaaniarneq avatangiisinik illersuiniaqatigiiffinnit arlalinnit akerlilersorneqarpoq. Timmisartunik angallassineq gassimik CO2-mik pilersitsiviungaatsiartarpoq, silallu kissatsikkiartuinnarneranut pissutaalluinnarluni.
- Silap kissatsikkiartuinnarneranut atatillugu Stanstedip mittarfiata allilerneqarniarnera annikitsuinnartut nalilerneqarsinnaavoq, suullu tamarmik taama oqaatigineqarsinnaapput. Timmisartunik angallassineq annertusiartorpoq, Stanstedilli mittarfiata taama annertutigisumik allileniarneqarnera pisariaqanngilaq, CO2-millu aniatitsinerup killilersimaartinniarneqarnissaa pingaaruteqarpoq, Aqqaluk Lynge aviisimut Cambridge Evening News-imut oqarpoq.
Silap allanngoriartuinnarnerata nunatsinni kingunipilorisimasai Aqqaluk Lyngemit aamma ersersinniarneqarput, mittarfimmillu allisaaniarnerup eqqarsaatigeqqinneqartariaqarnissaa oqariartuutigalugu.
- Issittumi ullutsinni maluginiakkagut ilissi aamma malugiumaarpasi, avatangiisit pillugit suliniuteqarniat Tuluillu Nunaanni mittarfeqarfiit atorfilittaannut Aqqaluk Lynge oqalugiaammini taama oqarpoq.