Mittarfissualiassat partiimik avissaartitseqqittut

Siulersuisuunerni ilaasortat ilaat, Bendt B. Kristiansen, aamma Avannaata Kommuniani kommunalbestyrelsimi ilaasortaavoq. Taassuma Avannaata Kommuniani IA tunuliaqutaralugu ilaasortaqatinilu Ilulissani mittarfiup allilerneqarniarneranut utaqqinissamut isumaqataanngillat.

- Akornutigisussaasarput uaniissagami mittarfik naappallaarpat Islandilu kisiat aallaavigiuassagutsigu nutaamik ineriartorsinnaanissamut killilimmik inissisimajuassagatta, IA-p kommunalbestyrelsimi ilaasortaatitaata aappaa, Bendt B. Kristiansen oqarpoq. 

Taarsiullugulu IA-p Avannaata Kommuniani ilaasortaatitaasa Naalakkersuisut siulittaasuata aamma qallunaat ministeriunerata qallunaat naalagaaffiata mittarfissuarnut aningaasaleeqataanissaanut isumaqatigiissutaannik nuannaarutiginnipput.

Avannaata Kommunianimi IA-mi ilaasortat Ilulissani mittarfik 2200 meterisut Nunatsinni ineriartornermut aallartissutaajumaartoq upperaat.

- Taamaaliornikkut aatsaat aningaasaanik nutaanik Nunatsinnut isaatitsinissaq periarfissarsiorneqarsinnaammat. Aalisakkanik avammut niuernerup annertusarneratigut, Bendt B. Kristiansen oqarpoq.

AAMMA ATUARUK IAs lufthavnspakke skader udviklingen i samfundet

IA-p Sara Olsvig siuttoralugu takornariarpassuit, mittarfiup tallineqarneratigut amerlanerullutik tikittalertussatut naatsorsuutigineqartut unnuffissaqalerseqqaarlugit Ilulissani mittarfiup 2200 meterinut tallineqarnissaa siunnersuutigaa.

Kisianni namminersorlutik inuussutissarsiuteqartut aallartinnissaminnut mittarfissap aningaasaliiffigineqarnissaa utaqqiinnaraat avannaani IA-meersut oqariartuuteqarput.

- Tassa piareersartariaqarneq ilalerparput. Aamma tamanna kommunimi peqataaffigivarput. Eqqaamassavarput uani aamma massakkut takornariartitsisut piareersareermata pilersaarusiorlutik. Mittarfiup tallineqarnissaanut aningaasaliissutit akuersissutigineqarlutik inissinneqarpata Ilulissani hoteliliornissamik pilersaartut minnerpaamik marluk piupput, Bendt B. Kristiansen oqarpoq.

Bendt B. Kristiansen partiimini siulersuisuunerni ilaasortaavoq. Tassanilu naqissusersimavaa nammineq piareersimaffiginagu Nunatsinni ineriartornissamut periarfissamut taama annertutigisumut unitsitseqataanissani.

- Taannalu politikkikkut suliaq naammassillugu peqataaffigissallugu inissisimavunga. Aamma partiitta tunngaviatigut siunertaq tamanna siunertarivaa, Bendt B. Kristiansen oqarpoq.

AAMMA ATUARUK Aaqqiissutissap ataatsimoortuunissaa Naalakkersuisut aalajangiusimavaat

AAMMA ATUARUK Koalitionspartierne afviser IAs lufthavnspakke