Assi: Kalaallit Airports A/S

Nuuk: Mittarfissap silissusissaa minnerpaaffimmiissasoq

Nuummi mittarfissap eqqaa 210 meterinik silissuseqarpoq, nunalli tamalaat akornini innersuussutigineqartarpoq tamakku 310 meterinik silissuseqartassasut.

Danmarkimi Angallannermut Aqutsisoqarfik, nunap pissusaanik peqquteqarluni mittarfiliornissamut arfinilinnik immikkut ittumik akuersissuteqarpoq. Illuatungaatigullu Kalaallit Airports A/S piumasaqaatinik arlalinnik nammassinnissaaq. 

Timmisartut miffigalugulu tingiffissaat siunissami 45 meterinik silissuseqassaaq miffigisartagarlu massakkut 30 meteriinnaalluni.

Nunalli ilaa mittarfissap inissisimaffigisaa tamakkiisoq silinnerpaaffimmini 210 meteriuvoq isuinilu illuttut 150 meteriussalluni.

Taamalu Naalagaaffiit Peqatigiit mittarfiliornermut nunat tamalaat akornini malittarisassatut innersuussutigisaanit aminneruvoq. 

Mittarfilli ullumikkut pinguttamiippoq avataatungaa innaaqqissuulluni. Mittarfillu 300 meterinik silissuseqartinniarlugu pinguttaq allisarneqassappat akisoorujussuussasoq, Kalaallit Airportsimi suliniuteqarnermi pisortaq, Jesper Nordskilde, KNR-imut oqarpoq.

Taamaammat mittarfik isuini aminnerunissaa pisariaqartoq, ingerlatseqatigiiffiup ilisimatitsissutigaa.

Nuummi mittarfittaassaq. Runway tassaavoq mittarfittavia, sinneralu tassaalluni asfaltimik qalligaq. Asseq: Kalaallit Airports A/S

Immikkut akuersissutit nalinginnaasut

Tamanna Danmarkimi Angallannermut, Sanaartornermut aamma Ineqarnermut Aqutsisoqarfimmit aamma Kalaallit Airportsimit paasissutissiinermi erserpoq.

Kisianni mittarfinnut immikkut akuerineqartarnerat nalinginnaasuvoq, pingaartumik nunap ilusia eqqarsaatigalugu.
Assersuutigalugu nunatsinni mittarfiit tamarmik piumasaqaatinik tamanik Naalagaaffiillu Peqatigiit innersuussutigisaannik naammassinninngillat.

Taamaattumik Nuummi mittarfissamut immikkut ittumik akuersissutit ilaat mittarfiup eqqaanut tunngapput, pitsaanerpaassaguni nunap ilaa manissuinnaasussaammat. Nuummi tamanna ajornarpoq, tassami qaqqaq Quasussuaq mittarfiup kangiatungaaniimmat.

 

Takissutsit – Nuummi mittarfik nutaaq

  • Mittarfittavia, aamma ’runway’-imik taagorneqartoq, 2200 meterinik takissuseqassaaq 45 meterinillu silissuseqassalluni.
  • Mittarfik kaajallallugu, mittarfittaa ilannugllugu, isumannaallisaanermut killeqarfik qeqqani 210-ussaaq isuinilu 150 meteriussalluni.
  • Naalagaaffiit Peqatigiit silaannakkut angallannermut sullissiviat, ICAO, mittarfinnut nunani tamalaani atuuttussanik najoqqutassiortarpoq. Nuup mittarfissanut kaammattuutigineqarpoq mittarfimmut 2200 meteriusumut isumannaallisaanermut killeqarfik 300 meterinik tamakkiisumik takissuseqassasoq.
  • Nuummi mittarfittaassami takissutsit Danmarkimi Angallannermut aqutsisoqarfimmit akuerineqarput.

Najoqqutarisarisat: ICAO Anneks 14, Danmarkimi Angallannermut, Sanaartornermut Ineqarnermullu aqutsisoqarfik, Kalaallit Airports A/S

Illuatungaatigulli Danmarkimi Angallanneqarmut aqutsisoqarfik Kalaallit Airportsimut arlalinnik piumasaqaateqarpoq, ingerlatsiviup immikkut akuersissummik pissaguni naammassisassaanik.Ilaatigut tassaavoq sungiusaat immikkut ittoq ingerlatsiviup timmisartortitseqatigiiffinnut Nuummi mittarfittaassamut nunninniartunut neqeroorutigisassaa.Taavalu Kalaallit Airports silaannaap aalarulunneranut nakkutilliisummik immikkut ittumik atulersitsissaaq. 

AAMMA ATUARUK Nuup Mittarfiani isumannaallisaanermut killeqarfik naannerusoq akuerineqartoq

Kalaallit Airports KNR-imut paasissutissiivoq ingerlatsiviup Danmarkimi Angallannermut aqutsisoqarfimmit piumasaqaatit soorunami naammassisagai.

Angallannermut aqutsisoqarfiup erseqqissaatigaa immikkut ittumik akuersissutit eqqarsaatigalugit Nuummi mittarfimmi isumannaatsuunerup eqqortuunera akisussaafigiumallugu, tamanna Kalaallit Airportsimut allakkani erserpoq.

AAMMA ATUARUK Kalaallit Airportsip suliariumannittussarsiuussinissani kinguartikkaa

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat