Folketingimi kissaatit: Mittarfinnut isumaqatigiissut nunanullu allanut tunngasuni oqaasissaqarneruneq

Folketingimi ataatsimiinneq ullumi aallartippoq. Inuit Ataqatigiinniit Folketingimi ilaasortap Folketingimut qinersinissamut qaammatit amerlanerpaamik arfineq-pingasuinnanngortut naalagaaffiup nunatsinni mittarfinnut tapiissuteqarnissaa kissaatiginerpaavaa.

Savalimmiunit ilaasortap, Magni Argep Savalimmiut nunanut allanut tunngasuni oqaasissaqarnerulernissaat issaatigaa.

Inuit Ataqatigiinnit Aaja Chemnitz Larsen Folketingimi ataatsimiinnermik ammaanerni ukiut sisamassaani peqataanermini kalaallisoorluni takkuppoq.

Taassuma Folketingimut qinerseqqinnissaq kingusinnerpaamik qaammatit arfineq-pingasut affarluinnanngortut oqallisigineqartussanit tamanit nunatsinni mittarfissat pillugit aalajangiisoqarnissaa kissaatiginerpaavaa.

AAMMA ATUARUK Løkke Nuummi Ilulissanilu mittarfinnik piginneqataarusuttoq

- Nunatsinni mittarfinnut tunngatillugu inissiisoqarnissaa danskillu naalakkersuisuisa aningaasanik tapersiissuteqarusullutik aalajangernissaat. Attaveqaatinut nunatsinnilu ineriartortitseqataangaatsiartunik aammali inuussutissarsiutinik ineriartortitsinermik pilersitsisussamut aningaasaliisoqarnissaa.

Aaja Chemnitz Larsenip nunatsinni siuariartortoqalernissaa politikkikkut suliniutini pingaarnerpaatut isigaa.

Aaja: Nunarput Danmarkilu naligiissapput

Nunatta Danmarkillu naligiillutik suleqatigiinnissaat, Namminersorneq pillugu inatsimmi erseqqissaatigineqartoq, ataatsimut isigalugu pingaartinneqangaatsiarneqartariaqarsoraa. Tamannalu danskit naalakkersuisuisa qanimut isumaqatigiinninniarneratigut taamaallaat pisinnaasoq, Aaja Chemnitz Larsenip oqaatigaa.

- Assigiimmik naligiinnissamut ataqqinninnermik piumasaqarnissarput pisariaqarpoq - aammali Danmarkimut ataqqinninnermik tunniussisariaqarpugut. Taamaaliorutta Folketingimi angusinnaasarpassuaqarsinnaassagunarpugut, aaja Chemnitz Larsen oqarpoq.

AAMMA ATUARUK Folketingip ammaanersiornerani Aleqa, Kim Hansiluunniit peqataanngitsut

Magni: Aaqqissuussaaneq malillugu suliat ajornangaatsiarput

Savalimmiut nammineq aalajangiisinnaassuseqarnera Danmarkip nunarsuarmioqatigiinnut erseqqissaatigissaa, Savalimmiormiut folketingimut Republikanerinit ilaasortaatitaata, Magni Argep kissaatiginerpaavaa.

Aamma Danmarkimi naalakkersuisut Lagtingillu Savalimmiut nunanut allanut tunngasuni politikkikkut kiffaanngissuseqarnerulernissaanik isumaqatigiissuteqarsinnaanissaat kissaatigalugu.

AAMMA ATUARUK Nunani allamiunut suliassaqarfiup akisussaaffigilernissaa sivisunaarunneqartoq

- Savalimmiuni pisariaqartitatsitut siuariartornissamut killissanik pingaaruteqartunik pilersitsiniarnitsinni nunanilu tamalaani akuulaarniaraangatta ullumikkut aaqqissuussaaneq malillugu suliat ajornangaatsiartarput. Tamanna allannguiffiusariaqarpoq, Magni Arge oqarpoq.

Kissaatillu immaqa eqquussinnaaneranut ersiuteqarpoq. Ministeriunerummi ammaanermi oqalugiaammini Savalimmiut Kalaallit Nunaatalu nunanut allanut sillimaniarnermullu politikkimut akuutinneqarnerulernissaat oqallisigineqartoq oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat