Assi: Ineqarnermut Attaveqarnermullu Naalakkersuisoqarfik

Naalakkersuisoq Mittarfinnut immikkut akuersissutit politikkikkut suliassaanngillat

Nutaanik mittarfiliassanut immikkut akuersissuteqarnerit politikkikkut aalajangiiffigineqarneq-ajorput. Taamaammat Nuummi mittarfiliassamut arfinilinnik immikkut akuersissuteqartoqarnerani Naalakkersuisut Inatsisartullu akuutinneqanngillat.

Kalaallit Airports A/S-ip Nuummi mittarfiliornissamut atatillugu Danmarkimi Angalannermut, Sanaartornermut Ineqarnermullu aqutsisoqarfimmit immikkut akuersissutinik katillugit arfinilinnik tunineqarnerata Inuit Ataqatigiinnit Partii Naleqqamillu isornartorsiorneqarnerata kingorna, Attaveqaqatigiinnermut naalakkersuisoq, Karl Frederik Danielsen (S), taama nalunaaruteqarpoq.

Danmarkimi Angalannermut, Sanaartornermut Ineqarnermullu Aqutsisoqarfik malittarisassat aalajangersarneqartut naapertorlugit immikkut akuersissutinik tunniussisarpoq, mittarfimmi isumannaallisaaneq naggataagut qulakkeerneqartussanngorlugu:

AAMMA ATUARUK Nuummi mittarfiliornissaq Partii Naleqqap IA-llu isornartorsioraat

- Taamaammat immikkut akuersissuteqartoqartillugu Naalakkersuisut Inatsisartulluunniit akuliunneqarneq-ajorput, immikkut akuersissutit politikkikkut suliassaanngimmata, malittarisassalli atuuttut naapertorlugit suliatigut nalilersuinermik tunngaveqartarmata, Karl Frederik Danielsen tusagassiorfinnut nalunaarummi taama allappoq.

Immikkut akuersissuteqartoqartarnera nalinginnaasuuvoq

Nutaanik mittarfiliortoqartillugu pissutsinut arlalinnut tunngatillugu immikkut ittumik akuersissuteqartoqarnera aamma nalinginnaasuuvoq.

- Mittarfinnut oqartussat Nuummi mittarfittaassami isumannaallisaanerup naammaginartuuneranik 2017-imili naliliinerat Naalakkersuisut toqqissisimanartippaat, Karl Frederik Danielsen KNR-imut taama allappoq.

Immikkut ittumik akuersissuteqarnerup isumannaallisaanerup annikillisinneqarneranik isumaqannginnera taassuma erseqqissaatigaa. Piumasaqaatimmi saneqqunneqarnissaannut immikkut ittumik akuersissuteqartoqarpat, allanik aaqqiissutissanik iluarsiisoqartarpoq tassunga taarsiissutissamik.

Nuummullu tunngatillugu immikkut ittumik sungiusarnermut aaqqissuussineq ilaatigut pineqarpoq. Timmisartortitseqatigiiffiillu Nuummi mittarfimmik nutaamik atuerusuttut tamaasa Kalaallit Airportsip tamatuminnga neqeroorfigissavai.

Naalakkersuisoq: Suliassaqarfik nunatsinnit suli akisussaaffigineqalinngilaq

KNR-ip Karl Frederik Danielsenimut apeqqutigaa, Naalakkersuisunit politikkikkut suliassanngortitsisoqarnissaanut Kalaallit Airportsip sanaartugaanut Danmarkimi Angalannermut, Sanaartornermut Ineqarnermullu Aqutsisoqarfimmit immikkut akuersissutinik qassinik tunniussisoqarsinnaaneranut killiliisoqarsimanersoq.

Attaveqaqatigiinnermulli naalakkersuisup tamanna toqqaannartumik akissuteqarfiginngilaa, KNR-imullu akissutimini ima allappoq:

- Immikkut akuersissutit Naalakkersuisunut suliassanngillat, sulissaqarfik nunatsinnit suli akisussaaffigineqanngimmat.

Karl Frederik Danielsen aamma nunatsinni nunanilu tamalaani silaannakkut angallannermut erseqqissunik malittarisassaqarlunilu inassuteqarnera innersuussutigaa.

AAMMA ATUARUK Nuup Mittarfiani isumannaallisaanermut killeqarfik naannerusoq akuerineqartoq

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat