Mittarfinni akileraarutip qaffannissaa oqallisigeqqissavaat

Mittarfinni akileraarutip annertuumik qaffannissaanik kalerrisaarut nutaamik aaqqiiviginiarlugu Air Greenlandimit aallartitat Savalimmiunilu timmisartuutileqatigiiffimmit Atlantic Airwaysimeersut, Assartuinermut ministereqarfik Københavnip Timmisartoqarfiani novembarip ulluisa aqqarnanni ataatsimeeqatigissavaat.
oktobarip 14-at 2009 05:40

Timmisartuutileqatigiiffiit taakku marluk, nunanit namminersortuneersut, naalagaaffiup iluani timmisartuutileqatigiiffittut manna tikillugu akileraartartut, timmisartuutileqatigiiffittut nunani allaneersutulli siunissami assigiimmik akileraartalissasut, Københavnimi Timmisartoqarfiup ukioq-manna siusinnerusukkut kalerriutigaa.

Air Greenlandip pisortaata Michael Binzerip, oqarnera malillugu, taama pisoqassappat mittarfinni akileraarut 456 procentimik qaffassaaq, tassa 90 koruunimik, taannalu bilitsip akianut ilanngunneqassalluni.

Savalimmiunit Folketingimut ilaasortaq, Høgni Hoydal, ministeriunermut Lars Løkke Rasmussenimut tamanna pillugu allappoq, ministeriunerlu akivoq, timmisartuutileqatigiiffiit taakku marluk, Atlantikup Avannaaniittut, timmisartuutileqatigiiffinnit allanit allaasumik pineqassanngitsut. Neriuutiginerarpaa assortuunneq novembarimi ataatsimiinnermi qaangerneqarumaartoq.

Christian Keldsen Air Greenlandimiit Sermitsiap nittartagaanut ilisimatitsivoq, akileraarut oktobarip ulluisa aallaqaataannili atuutilertussaagaluartoq, suli atuutilinngitsoq, ilisimatitsissutigalugulu isumaqatigiinniarnerit eqqissisimasumik ingerlanneqartut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq