Mittarfimmi inummik annaassisut

Kulusuup mittarfianiit timmisartukkut Nuummut arfininngormat angalasussat ingerlaqqinnissaminnik utaqqitillugit tupanarluinnartumik pisoqarpoq.

- Oqaluussarput silammut tikkuarpoq oqarlunilu angummik uppittoqartoq, taava qiviarakku tassa takuarput angut uppisimasoq silami, Kommuneqarfik sermersuumi peqqinnermik, pitsaaliuinermik sunngiffeqarnermik suliaqarfimmi pisortaq Frederik Lundblad taama oqaluttuarpoq.

Inuk nunami nalasoq erngerlugu ornillugu tikikkamikku iliuusaa siulleq.

 - Tillernersiorpara, taava tillerneranik malugisaqannginnama kavaajaa tujuulualu tujuuluaraalu ammarterpakka uummarsarnissaanut piareersarlugu, Frederik Lundblad oqaluttuarpoq.

AAMMA ATUARUK Napparsimasoq kommunimi sulisunit annaanneqarpoq

Suleqataatali Kim Rosing uummammik aallartitsissummik piaarnerpaamik aallernermigut inuk annaassinnaasimavaat.

 - Taava qupinnguallatsereermat analyseereqqeriaramiuk tassa uummataa aamma aallartoq anersaartorlunilu aallartittoq paasivarput aamma takuarput, Frederik Lundblad oqarpoq.

Taannalu ikiueqqaarnermik arlaleriarluni pikkorissarsimasuuvoq. Ikiueqaarnermut pikorissarsimanissaq nunatta rødekorsianiit pingaartinneqarpoq.

 - Ikiueqqaarnermik pikkorissarsimagaanni, qanoq iliornissaq nalunarneq ajorpoq. Taava inuup allap inuuneranik aannaasiniarnissaq annilaanganarneq ajorpoq. Kulusummi pisoq tusagarput nuanneqaaq, Kalaallit rødekorsiani allaffeqarfimmi pisortaq Kirsten Mortensen oqarpoq.

Nunatsinni ikiueqqaarnermi iliniartitsisinnaasut katillugit 75-it missaaniipput, ilitsersuisartussallu 13-it sapaatip akunneri marluk qaangiuppata naammassisussaallutik.