Mittarfiliortiternissaq Løkkep Kielsenillu pingasunngornermi oqaluuseriniaraat

Nunatsinni mittarfiliortiternissaq naalakkersuisut siulittaasuata ministeriunerullu aqagu pingasunngornermi oqaluuserisussanngorpaat. Sanaartornerup danskinit peqataaffigineqarnissaa Løkkep kissaatigaa.

Naalagaaffeqatigiinni nunat siuttuisa, Lars Løkke Rasmussenip, Kim Kielsenip Aksel V. Johannesenillu naalagaaffeqatigiinneq pillugu ukiumoortumik ataatsimiinneranni, tamatumuuna Savalimmiuni ingerlanneqartumi, Nunatsinni mittarfiliortiternissaq taakkulu aningaasalersorneqarnissaat oqaluuserineqarput.

- Apeqqutit peqqissaartumik ingerlatsinissamut sillimaniarnermullu tunngasut ilaatigut eqqartorpagut. Aamma nunanit tamalaanit aningaasaliinerit ammaffiginissaasa nunamilu attaveqarnerup paarilluarneqarnissaa pillugu qanoq oqimaaqatigiissitsiniartoqarsinnaanersoq eqqartorparput, ministeriuneq Lars Løkke Rasmussen nalaagaaffeqatigiinneq pillugu ataatsimiinnerup kingorna tusagassiortunik katersortitsinermi taama oqarpoq.

AAMMA ATUARUK Naalakkersuisut siuttui angalaqatigiittut

Kalaallit Airports A/S-ip Nuummi, Ilulissani Qaqortumilu mittarfinnik sanaartornissamut piukkunnartussarsiornermi Kinamiut ingerlatseqatigiiffiannik China Communications Construction Companyimik (CCCC) toqqaasimanera danskit naalakkersuisuisa ernumanartoqartillugu arlaleriarlutik oqaatigisimavaat.

Aningaasaliinerit immikkut ataatsimiissutigineqassasut

Naalagaaffeqatigiinni nunanit allanit aningaasaliinerit pillugit atorfilittatigoortumik 'qanittumik oqaloqatigiinnerup' aallartinneqarnissaa nunat siuttuisa pingasut naalagaaffeqatigiinneq pillugu ataatsimiinnermi isumaqatigiissutigaat.

Oqaloqatigiinnerullu nunat akornanni 'oqartussaaffinnik agguataarineq ataqqillugu' ingerlanneqarnissaa politikerit naqissuserpaat.

Suleqatigiinnerullu qanoq kinguneqarnissaa arlaannaataluunniit siumut oqaatigereerusunngilaa, oqaatigaluguli nunanit allanit aningaasalersuinissamut periarfissat misissorneqassasut.

AAMMA ATUARUK Asiip Naalakkersuisut pakatsissutigigai

Nunanillu allanit aningaasalersuisoqarnissaa, pingaartumik attaveqarnermut tunngatillugu, Savalimmiunut maannakkorpiaq tunngassuteqanngikkaluartoq, sammisaavoq Lars løkke Rasmussenip Kim Kielsenillu pilertortumik oqaloqatigiissutigeqissallugu pisariaqartoq.

Taamaammat nalaakkersuisut siuttui Københavnimi pingasunngorpat ataatsimeeqatigiissapput nunatsinni mittarfiliortiternissamik pilersaarutit oqaluuseriniarlugit. Løkkep suliniutigineqartoq tamikkiisumik tapersersorlugu erseqqissaatigaa, aamma Danmarkip akuutinneqarnissaa kissaatigaa.

AAMMA ATUARUK Per Aarsleff A/S suliariumannittussarsiuussinermit tunuartoq

- Danmarkip arlaatigut peqataanissaa kissaatigigaluarpara. Kalaallit Nunaatami aningaasaliinikkut tapersersorneqarnissaa paasisinnaalluarpara, ministeriuneq KNR-imut oqarpoq.

Løkkep arlaleriarluni erseqqissaatigisarpaa, aningaasaliinissamut nunattalu siuariartornissaanut allaffissornikkut ikiuinissamut periarfissat danskit naalakkersuisuisa oqaloqatigiissutigerusukkaat.

Københavnimi ataatsimiinnissap imarisassaa naalakkersuisut siulittaasuata Kim Kielsenip ullumi marlunngornermi itinerusumik oqaaseqarfigerusunngikkallarpaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat