Mittarfiliornissamut aningaasat nassaariuminaattut
Qaqortumi mittarfiliornissaq aningaasarsiornermut ajoqutaassasoq nalunaarusiami immikkut ilisimasallit naliliipput, tamannalu KNR-imi sammineqarnikuuvoq.
Aamma atuaruk Nalunaarusiaq: Qaqortumi mittarfiliortoqarpat inuiaqatigiinnut iluanaarutaassanngilaq
Attaveqarnermut Naalakkersuisoq Knud Kristiansen (A) nalunaarusiami inerniliunneqartut pillugit isumaa allanngorsimanersoq aperineqarami erseqqissumik akissuteqanngilaq.
Taassuma Qaqortumi mittarfiliortoqarnissaa kisiat siunertarinngilaa, mittarfiilli arlallit sananeqassasut siunertaralugu. Aningaasaliisussat millioni koruunerpassuarnik nalillit suminngaanit pissarsiarineqassanersut apeqqutinngorpoq. Taakkua Naalakkersuisut aappaagu suliarissagunarpaat.
- Aningaasalersornissaa pillugu annerusumik oqaaseqarusunngilanga, suliamut taassunga tunngasumut killikkatta aamma unamminartuusussaasoq nalunngilara, Knud Kristiansen oqarpoq.
- Pilersaarut tamakkiisoq, tassalu nunarput tamakkerlugu angallannikkut attaveqalernissaq, pineqarpoq.
Pilersaarummi Qaqortumut taamatullu kujataani aamma Narsami timmisartunut mikinernut miffigineqarsinnaasoq pineqarpoq. Kisianni tassa angallannermut pilersaarut tamakkiisoq soqutiginartinneruvara, Knud Kristiansen oqarpoq.
Aningaasaliisartut namminersortut ilimagineqanngitsut
Mittarfik ataaseq kisiat pinnagu pilersaarut tamakkiisoq oqallisigissallugu Knud Kristiansenip soqutiginerullugu, Knud Kristiansen KNR-imut oqarpoq.
Qaqortumi mittarfiliortoqarpat tamanna imminut akilersinnaassanngitsoq nalunaarusiami nalilerneqarpoq, aamma aningaasaliisartunik namminersortunik nassaarnissaq ajornakusuussasoq nalilerneqarluni, naak taakku Naalakkersuisut periarfissatut taanikuugaluaraat.
Pilersaarutip tamakkiisup ilaa ataaseq imminut akilersinnaanngitsutut nalilerneqarnera Naalakkersuisunit pimoorunneqarpa?
- Aap taamaaliorpugut. Pimoorupparput, uanilu eqqarsaatigisassarput tassaavoq, ataatsimoortutut isigineqartussaammat, tamannalu ima paasineqassaaq, nunarput tamakkerlugu iluaqutaasussamik pimoorussisoqarmat. Ima paasineqassanngilaq timmisartoqarfiit imminnut akilersinnaanngitsut matussagatsigit, Knud Kristiansen oqarpoq, nangillunilu;
- Aningaasaliiumaartussanut tunngatillugu ataasiakkaat pillugit maannakkut oqaaseqarsinnaanngilanga, Attaveqarnermut Naalakkersuisoq oqarpoq.
Attaveqarnermut Naalakkersuisup angallannermut pilersaarutga, ilaatigut mittarfiliornissamut pilersaarut, Inatsisartut ukiakkut ataatsimiinneranni saqqummiunniarpaa. Taamaanngippat ukiup tulliani piumaartoq Knud Kristiansen oqarpoq.
