Assi: KNR // Anton Gundersen Lihn

Aningaasaqarnermut Siunnersuisoqatigiit: Mittarfiliorneq pioreersunilluunniit atuiinnarneq aningaasaqarnermut assigiippoq

Nutaanik mittarfiliornikkut pioreersulluunniit atuinnarnerisigut aningaasatigut iluaqutissat assigiinngissutaat malunnangaanngillat. Aningaasaqarnermut Siunnersuisoqatigiit Aningaasaqarnermut Naalakkersuisoqarfimmut allakkaminni taama naliliipput erseqqissarlugulu, mittarfiliortiternissaq pillugu sinaakkutaasutut inatsisissatut siunnersuummi ajutoorfiusinnaasut isummerfigineqarnerat annikippallaartoq.

Mittarfiit nutaat taavalu Kangerlussuup Narsarsuullu qulimiguulinnut mittarfinngortinneri Deloittemit naliliineq naapertorlugu mittarfioreersunik nutarsaanermut aningaasaliinermullu naleqqiullugu inuiaqatigiinnut 1,3 milliardit koruuninik iluanaarutaassaaq.

Kisianni Aningaasaqarnermut Siunnersuisoqatigiit naapertorlugit taama isumalluarnartiginngilaq. Siunnersuisoqatigiit, paasissutissanik saqqummiunneqarsimasunik misissuisimasut, Aningaasaqarnermut Naalakkersuisoqarfimmut allagaanni tamanna ersippoq.

AAMMA ATUARUK Mittarfissat upernaakkut ataatsimiinnermi siullermeerlugit oqaluuserineqassapput

Tamatumunnga ilaatigut tunngavilersuutigaat, maanna mittarfiusut nutarsarneri nutaanik mittarfiliornermit akikinnerussammat, taamaalillunilu allanut, inuiaqatigiinnut aamma iluaqusiisussanik, aningaasaliinissamut aningaasassaqassalluni.

- Paasissutissat pissarsiarineqarsinnaasut tunngavigalugit kiisalu taama nalunaarsuinerit nalorninartoqarnerat pissutigalugu aaqqiissutissatut periarfissat taakku marluk inuiaqatigiit aningaasaqarnerannut kingunerisassaat pingaarutilimmik allaanerussuteqanngitsut Aningaasaqarnermut Siunnersuisoqatigiit isumaqarput, allakkami ersippoq.

AAMMA ATUARUK Mittarfiliortiternerit nutaat milliard koruuninik sipaaruteqarfiussasut missueqqissaarnermi inerniliunneqarpoq

Aammalumi nalornisutit ajutoorfiusinnaasullu mittarfiliortiternissamik pilersaarummi naammattumik eqqarsaatigineqarsimanngitsut, Aningaasaqarnermut Siunnersuisoqatigiit isumaqarput.

- Namminersorlutik Oqartussat suliniummi aningaasaqarneq tamaat akisussaaffigissavaat. Taamaattumillu suliniummi aarlerinaateqarsinnaasut pitsaanngitsumillu nikingassutaasinnaasut immikkut isiginiarneqarnissaat aalajangiisuulluni pingaaruteqarpoq. Siunissami kinguneqaataasinnaasut tassaapput annertoorujussuarmik sipaaruteqarnissaq imaluunniit akileraarutinik qaffaanissaq, Aningaasaqarnermut Siunnersuisoqatigiit allapput.

AAMMA ATUARUK Mittarfittaassat 165 millioninik sipaaruteqartitsissasut

Kisianni Aningaasaqarnermut Siunnersuisoqatigiit aamma erseqqissarpaat, mittarfiliornissamut pilersaarut ajutoorfissartaqaraluartoq, inuussutissarsiutinik siunissami inerisaanissamut periarfissiissasoq. Suut tamaasa eqqarsaatigigaanni tamanna politikerit aalajangigassaraat, aalajangiisuussaarli  pitsaaqutit ajoqutillu tamarmik misissortariaqarnerat, siunnersuisoqatigiit allapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat