IA Avannaa Mittarfiit taasissutigineqarmata tupaallatigineqarpoq

Mittarfiit pillugit inatsisartuni sisamanngormat taasissoqarmat Inuit Ataqatigiit ilaasortaatitaanni akerliusut amerlanerupput. Inuit Ataqatigiit taasisoqalerpat taasiniarnatik nalunaarugigaluarpaat.
Aqqalup B. Egede Inatsisartuni mittarfiit taasissutigineqarmata akerliulluni taasivoq Assi © : KNR
novembarip 17-at 2018 14:46

Inuit Ataqatigiit taasisoqalerpat taasiniarnatik nalunaarutigigaluarpaat.  Inuit Ataqagiiit Ilulissani immikkoortortaqarfiani akerliusoqarnera tupaallaatigineqarpoq. 

AAMMA ATUARUK Mittarfinnut pilersaarut akuerineqarpoq

 - Akerliunermik taasineq soorunami malugigakku tupaallaatigalugu oqaatigissavara,  kisianni tassa taama inerneqarpoq,

Avannaata kommuniani Kommunalbestyrelsemi Inuit Ataqatigiit siulittaasuat Bendt B. Kristiansen taama oqarpoq. Aqqaluaq B. Egede IA inatsisartuni akerliulluni taasivoq.

  -  Inuussutissarsiornikkut allannguinerup, ilaatigut nunaqarfinni matuseratarsinnaanerup apeqqutinnut tunngasut qulaajaavigineqarsimanngillat,  kommunenut tunngasut qulaajaavigineqarsimanngillat, taakkuuppullu itigartitsisariaqalernitsinnut tunngaviusut,  aamma naapereeriaagaluarnitsinnut orninneqannginnerput itigartitsinitsinnut  tunngaviusut, Aqqaluaq B. Egede oqarpoq.

Inuit Ataqatigiit inatsisartuni ilaasortaatitaani taaseqataannginnissamik neriorsuuteqarlutik eqquutitsisut aappaa tassaavoq Stine Egede.

- Mittarfiliortiternerit isumaqatigaakka, taamaallaalliuna periuseq atorneqartussaq  isumaqatiginngikkiga, Stine Egede Inuit  Ataqatigiit taama oqarpoq.

Inatsisartuni taasisitsisoqarmat Inuit Ataqatigiit ilaasortaatitaasa ilai akerliullutik taasinerat avissaartuuttoqarneranik paasineqassanngitsoq Aqqaluaq B. Egede oqarpoq.

- Suliaq immikkuullaritsigisoq,  aammalu suliaq annertoorujussuaq,  sumiiffinnut ataasiakkaanut,  immaqa qanoq attuinissaanik assigiinngitsunik paasisimasaqarluta,  taamaammat pingaartissimasarput unaavoq,  inuttut qanoq naliliinerput nammineq taasinikkut takutissallugu, Aqqaluaq B. Egede taama oqarpoq. 

AAMMA ATUARUK Sara Olsvig Inuit Ataqatigiit siulittaasuattut tunuartoq

Inuit Ataqatigiit  siulittaasuat Sara Olsvig  oktoberip qaammataata naalernerani tunuarpoq. Siulittaasussatullu suli qinigassanngortittoqanngilaq. Inuit Ataqatigiit siulittaasussasiorlutik immikkut ittumik ataatsimeersuassapput inatsisartut ataatsimiinnerat  naammassippat