Isumalioqatigiissitami siulittaasuusimasoq: Mittarfiit nutaat Kalaallit Nunaannut iluaqutaalluassapput
Inatsisartut mittarfissat pillugit aalajangiinerat mittarfiit pillugit suliniummik annertuumik suliaqarsimasup qujaruppaa.
- Kalaallit Nunaannut iluaqutaalluarnissaa neriuutigineqarsinnaavoq. Uanga taama neriuuteqarpunga, aamma mittarfiit pillugit suliniuteqarnermi tamanna tunngaviusoraara, Isumalioqatigiissitami siulittaasuusimasoq Christen Sørensen taama oqarpoq.
AAMMA ATUARUK Mittarfinnut pilersaarut akuerineqarpoq
Takornariartitsineq ineriartortitsiffiulluarsinnaasutut taavaa, qaleralinnillu nutaanik akigissaarnerusunik Ilulissanit avammut nioqquteqartoqalersinnaanera aamma upperalugu. Mittarfiilli pillugit maanna pilersaarutaasoq Christen Sørensenip siulittaasuunerata nalaani pilersaarutaasumit allaanerungaatsiarpoq.
- Assartuussineq pillugu isumalioqatigiissitami suligallaratta Nuup eqqaani periarfissat marluk aamma misissuiffigaagut, isumannaatsumilli timmisartuussiffigineqarsinnaanissaat qulakkeersinnaannginnatsigu pilersaarutit ingerlateqqinnagit. Timmisartuussinikkulli teknologii ineriartorfiulluarpoq, taamaammat ilimagaara tamanna iluarsineqarsimassasoq, Christen Sørensen oqarpoq.
AAMMA ATUARUK Mittarfinnut pilersaarut pillugu ilisimasaqarnerulerit
Aaqqiissutissamillu pitsaanerpaamik nassaartoqarsimanissaa siulittaasuusimasup tatiginerarpaa, aningaasalersuinissamullu pilersaarutigineqartoq pitsaalluinnartutut isigalugu.
- Danskit naalagaaffiata aningaasaleeqataanera Kalaallit Nunaatalu taarsigassarsiniarneranut qularnaveeqqusiinera pitsaasoraara, taamaaliornikkut erniat appasinnerunissaat ilimagineqarsinnaammat.
AAMMA ATUARUK Christen Sørensen: Politikerne bestemmer
Christen Sørensenilli suliassap imaannaanngitsuunera aamma erseqqissaatigaa.
- Aningaasaliinermi annertuupilussuuvoq, taamaattumillu aamma aarlerinaateqarsinnaalluni. Taamaammat ingerlalluartoqassappat sanaartornermik suliniutit aqulluarneqartariaqarput.
Assartuussineq pillugu isumalioqatigiissitap suliani 2011-mi naammassivaa, Christen Sørensenilli nunatsinni attaveqaatit ineriartortinneqarnerinut suli malinnaavoq.
AAMMA ATUARUK Mittarfiit pillugit isumaqataasut isumaqataanngitsullu tunngavilersuutaat aajuku
- Umiarsualiviup naammassineqarnera nuannaarutigaara, aamma siunissamut qulakkeerinniffiunerusumik mittarfeqarnikkut aaqqissuussisoqarnissaa nuannaarutigaara. Maanna pisut ilaat ilimagisimanngilagut, paasissutissalli nutaat saqqummersimammata iluarisimaarluarpakka, Christen Sørensen oqarpoq.
