Mittarfeqarfiit nalliuttorsiorput
Mittarfeqarfiit Namminersornerullutik Oqartussanit 1988-mi pilersinneqarput, taamani mittarfeqarfiit allaffissornikkut aqunneqarnerat ingerlanneqarnerallu suliffeqarfimmut ataatsimut katersorneqarnissaat kissaatigineqarmat. Mittarfeqarfinnik ingerlatsineq assigiinngitsunit aqunneqartarsimavoq: Sakkutuunit, Grønlandsflymit, aatsitassarsioqatigiiffimmit Greeneximit, Grønlands Tekniske Organisationimit (GTO), Den Kongelige Grønlandske Handelimit (KGH), Naalagaaffiup Silaannakkut angallannermut aqutsisoqarfianit (SLV) kiisalu US Air Forcemit.
Mittarfeqarfiit pilersinneqarnerisigut nunatsinni mittarfeqarfiit aqunneqarnerat Kalaallit Nunaanni suliffeqarfimmut siullerpaamik katersorneqarpoq. 1988-mit 2013-imut mittarfeqarfiit arlallit pilersinneqarput Mittarfeqarfiillu nunatsinni suliffeqarfiit annersaasa ilagilersimavaat.
Ukiut siulliit 25-it nalliuttorsiutigineqassapput, pisortaanerulli Jens Lauridsenip aamma Mittarfeqarfinni ataqatigiillaqqissutsip allannguuteqartoqarnissaanullu piareersimajuarnerup immikkuullarissuusup immikkut sammineqarnissaat aamma kissaatigisimavaa.
”Mittarfeqarfinnik ingerlatsillaqqissuuvugut, tamannami ukiorpassuarni suliniaqarnitsigut uppernarsarsinnaavarput. Mittarfeqarfinnili atorfeqarninni tupaallaatigisimasara tassaavoq, siammasissupilussuarmi najugaqaraluarluta assigiinngitsorpassuarnillu suliaqaraluarluta, soorlu nalituunik assartuineq, akunnittarfinnik ingerlatsineq timmisartullu orsussaannik tuniniaaneq, taava suliffeqarfimmi ataatsimi ataatsimoorussamik anguniagaqarlutalu ataatsimoorussamik kinaassuseqarsinnaajuarsimavugut. Isumaga malillugu, Mittarfeqarfiittut kinaassuserput pigiinnarlugu naleqqussarsinnaassuseqarnerput sulinitsinni qitiujuassaaq", Jens Lauridsen oqarpoq.
