Mittarfeqarfiit biilinut sivisunerusumik unittarfeqalersitsiniarput

Nuup mittarfiani aasaanerani inuit feriarnerminni biiliminnik mittarfiup biilinik inissiisarfianut qimatsisarnerat unitsinniarlugu, Mittarfeqarfiit biilit inissiisarfianut biilinik uninngatitsisinnaaneq killeqartilissavaat.

Nuup mittarfiani ullup qeqqata kingorna biilit 80-t sinnerlugit biilit inissiisarfianut qimanneqarsimapput.

-Takornartaanngilaq biilit 100-t tungaanut biilit inissisarfiani uninngasarnerat, uangalu oqartussaasuuguma aasaanerani Nuup mittarfiani akeqanngitsumik biilinik inissiisarneq qangali unitsissimassagaluarpara, Mittarfeqarfinni pisortaq Jesper Juhl oqarpoq.

Mittarfeqarfinnit aalajangerneqaqqammerpoq sukkanerpaamik mittarfiup biilinik inissiisarfiani allagartaliisoqassasoq, biilinik inissiisinnaaneq killeqalersillugu.

Allagartat nivinngarneqariarpata biilinik uninngatitsisinnaanerup 36 tiiminik sivisussuseqartalernissaa ilimagineqarpoq.

-Aaqqiineq atuutilerpat biilit sivisuumik uninngasut mittarfiup biilinik inissiisarfianit peerneqarsinnaalissapput, Jesper Juhl oqarpoq.

Mittarfeqarfiit siornatigut Nuup kommunianut saaffiginnissuteqarsimagaluarput siunnersuuteqarlutik mittarfiup ungasinngisaanut nutaamik biilinut inissiisarfilioqqullugit. Tamannali ulloq manna tikillugu suli pisimanngilaq.

Aasaanerani biilinik mittarfinnut qimatsisarneq Nuummiunerusoq pisarpoq. Nunatsinni mittarfinni allani atugaavallaanngilaq, mittarfiit sinerissamiittut akunniffiulaaginartarmata.