Mittarfeqarfiit 42 mio.kr.-nik siorna pitsanngoriartitsivoq

Mittarfeqarfinni aqutsisunngortut sulinermik nutaamik ukiup ataatsip matuma siorna aallartitsipput, tassani Mittarfeqarfiit sullitanik samminniffiunerulersinneqarnissaat aningaasaqarnikkullu imminut akilersinnaanerulersinneqarnissaat tamatumunngalu peqatigitillugu ukiuni arlalinni aningaasalersuinikkut aserfallatsaaliinikkullu kinguaattooqqanerup iluarsineqarnissaa siunertaalluni, Ineqarnermut, Attaveqarnermut Angallannermullu Naalakkersuisoq Jens B. Frederiksen nalunaarpoq.

2010-mut naatsorsuutini maannakkut takuneqarsinnaalerpoq aalajangiineq taanna eqqorluinnartuusimasoq. Taamaalilluni Mittarfeqarfiit angusaat 2010-mi pitsanngoriarujussuarsimapput. Nalikilliliinerit aningaasalersuutillu ilanngunnagit 2009-mi 22,6 mio. kr.-inik amigartooruteqartoqarsimagaluartoq, 2010-mi 19,4 mio. kr.-inik sinneqartooruteqartoqarsimavoq, tamannalu 42 mio. kr.-inik angusatigut pitsanngoriaataavoq. Nalikilliliinerit aningaasalersuutillu ilanngullugit 2010-mi 49,6 mio. kr.-inik amigartooruteqartoqarsimavoq 2009-mi 97,4 mio. kr.-inik amigartooruteqartoqarsimalluni.

Angusat Ineqarnermut, Attaveqarnermut Angallannermullu Naalakkersuisup Jens B. Frederiksenip naammagisimaarluinnarpai:

- Isumaqarpunga Mittarfeqarfiit angusanik taama pitsanngoriaateqartitsisimatiginerat kusanartuusoq. Nalunngilara aqutsisut sulisullu anguniagaqarlutik suliniartariaqarsimasut periarfissarlu iluatsillugu suliniarnermut tamatumunnga qutsavigerusuppakka. Tamatumunnga peqatigitillugu aamma ilaatigut atuisunut nuannaarutaasumik sivisunerusumik ammasarfeqalernikkut sullissinikkut pitsanngorsaasoqarsinnaasimanera nuannaarutigaara, oqarpoq, pitsannguutillu ilaatigut tassaanerarlugit Kangerlussuarmi terminalimik alliliinikkut kiisalu ilaasunut takornariartitsinermillu inuussutissarsiuteqartunut iluaqutaasumik sivisunerusumik ammatitsisarnermik misileraanikkut. Sivisunerusumik ammasalernerit ataavartunngortinneqassapput.