Mitit qiviui isertitsissutaasinnaaqaat

Atlantikup Avannaani suliniut, Nunat Avannarlerniittut Suleqatigiiffianit, NORA-mit, tapersersorneqartoq, pissutigalugu, qiviunik soqutiginninneq uteqqilerunarpoq.

- Meqqit qiviui ilippanaateqarluarput, pingaartumik Kalaallit Nunaanni, uumasorsiooq, økologiimik immikkut ilisimasaliusoq, Thomas Holm Carlsen, oqarpoq.

Kalaallit Nunaanni, Norgep sineriaani, Islandimi Savalimmiunilu meqqit qiviuinik nungusaataanngitsumik atuinissamut NORA-p suliniutaanik taanna aqutsisuuvoq.

Kalaallit Nunaanni 60- 70.000-inik ullumikkut miteqarpoq, ukiunilu qulikkuutaani kingullerni amerliartupilooqalutik.

- Meqqit soqutiginaatigaat qiviui timmissanut taakkununnga ajoqutaanngitsumik katersorneqarsinnaammata, Thomas Holm Carlsen nassuiaavoq.

Qiviunilli nungusaataanngitsumik katersisarneq, avatangiisit aningaasallu eqqarsaatigalugit, suliarujussuuvoq, qiviut ilippanaateqartumik atorluarnissaannut piffissaq sivisusinnaasarluni, Thomas Holm Carlsen Radioaviisimut erseqqissaavoq.

Iluatsissappalli tamanna kalaallinut nuannersorujussuussaaq.

Qiviummi pilerinartorsuupput. Qipik meqqit qiviuinik immigaq Norgemi 20.000 koruunit 50.000 koruunillu akornanni akeqarpoq, tunineqartarnerallu akornutissaqanngilaq. Qipik qiviunik immigaq 1 kilop missaanik imaqartarpoq.

Kommuneqarfik Sermersuup nalunaarusiaani saqqummeqqammersumi allassimavoq qiviut minnerpaamik 500 kiilut Nunatsinni ukiumut suliarineqarsinnaasut. Sulili annertusinerunissaat ilimagineqarpoq.

- Kalaallit meqqit nungusaataanngitsumik piniartarpatigik, 500 kiilut kiilorpassuanngorsinnaapput, Thomas Holm Carlsen oqarpoq.