Mitertortartut aqerlumik akoqaqaat
Kalaallit aamminni killissarititaasoq qaangerlugu aqerlumik akoqalersarnerannut timmiaruartukulaneq peqqutaavoq. Ilisimatuut aap aqerlumik akoqalersarnera pillugu ukiuni marlunni missuereerlutik naammasseqqammersut taama inerniliipput. Misissuisoq Dansket avatangiisumut misisuisoqarfianeersoq Poul Johansen oqarpoq kalaallit aqerlumik aamminni akoqarnerat misissuinermi uppernarsineqartoq.
- Siornagulli misissuisarnernit paasineqarsimavoq, inuit timmiaruartukulanerusut aamminni aqerlumik akoqarnerusartut. Tamannalu pillugu Nuummi nakorsiartarfik suleqatigalugu misissuineq 2003-mi septembarimi aallartipparput. Inuit aamminni aqerlumik akoqalersarnerat timmiaruartukunerannik ilumut peqquteqavinnersoq qulakkeerniarsimavarput, uppernarsillugulumi, Poul Johansen oqarpoq.
- Timmiarussat timmiarsiutinik pisat amerlasuuiaraluaraanniluunniit amerlasuui aqerluusut sinnikoqartuaannarput, taakkulu nerisumut ingerlaqqittarput. Aqerloq aammut akuleruttoq killeqartinneqarpoq, killissarititaasorlu qaangerlugu aqerlumik mingutsinneqarneq ulorianarsinnaavoq, aqerlorlu meeqqat ilikkarniartarnerannut akornusiisinnaavoq naartunullu ajoqusiisinnaalluni. Taamaattorli Nuummi inersimasunik 50-inik misissuinermi peqataasut timmiaruartukulagaluartulluunniit ulorianartorsiuissutut oqaatigineqarsinnaanngillat, naak ukiup ingerlanerani timmiaruartorfiup nalaani amminni aqerlumik akoqalersarnerat killissarititaasumit annertunerulersaraluartoq Poul Johansen oqarpoq.
Nunatsinni timmiarussani mitit appallu aqerlumik akoqarnerpaasut paasineqarpoq, mitit appanit aqerlumik akoqarnerullutik. Sapaatip-akunnerani ataasiarluni mitertorneq killissarititaasoq qaangerlugu aqerlumik aammi akoqalissutaasarpoq. Sapaatip-akunneranilu ullut tamaasa appatortaraanni killisarititaasoq aatsaat qaangerneqarsinnaalluni. Poul Johansenip nerisat pillugit siunnersuisussaannginnini erseqqissaatigaa taamaattorli mitertortarnerminngarnit appatortarnerunissaq siunnersuutigisinnaallugu oqarpoq.
Amerlasuut aqerlortallit nunani allani inerteqqutaaleriartornerat pissutigalugu, nunatsinni amerlasuut aqerlortallit atugaanerisa mingutsitsinermut peqqissutsimullu tunngatillugu oqallisigineqarnissaa Poul Johansenip ilimaginerarpaa. Avatangiisinut Pisortaqarfimmit ilisimatitsissutigineqarpoq amerlasuut aqerlortallit atugaanerat aappaagu oqallisissiarineqassasoq.
