Mitaallaqqinnerpaaq unnugu toqqarneqassaaq
Sisimiuni mitaartut kulturikkut illorsuarmi Taseralimmi unnugu arfineq pingasut qeqqanut naapinnissaminnut periarfissaqassapput.
januaarip 06-at 2011 07:14
Nunatsinni illoqarfiit tamarmik mitaartitsisarnermik ileqqoqarput, immikkulli tamarmik periuseqartarlutik. Sisimiunilu kunngit pingasut ulluat mitaarfiusarpoq.
Taamaattumik kulturikkut illorsuaq Taseralik, mitaartunik Taseralimmi unnugu nalunaaqutaq arfineq pingasup qeqqanut naapisitsinissaminut periarfissiivoq, ilaatigut mitaallaqqinnerpaamik toqqaasoqassalluni. Mitaallaqqinnerpaap toqqarneqarnissaanut dommeriussapput Abigael Markussen, Flemming Larsen aamma Ammunnguaq Jonathansen. Taama Taseralik tusagassiuutinut nalunaarummini allappoq.
Mitaarfimmut atatillugu Sisimiut Katersugaasiviata Taseralik suleqatigalugu Taseralimmi kiinappaat 1900-p aallartinnerani amermik sanaat marluk saqqummersissavai.
