Missilinut illersuutissaq oqaloqatigiissutigaat

- Missilinut illersuusiornissap ineriartortinneqarnissaa pillugu USA-p Danmark oqaloqatigaa, oqaloqatigiinnerlu isumalluarnartumik ineriartorpoq, taama oqarpoq, USA-p illersornissamut ministeria Robert Gates, ministerit qinikkat aallartitat sakkutooqarnermillu suliaqartut nunanit assigiinngitsunit 40-neersut, sillimaniarneq pillugu Tysklandimi Münchenimi ataatsimeersuarneranni peqataasoq.

Robert Gates ataatsimeersuarnermi ullumi oqalugiarnermini oqarpoq missilinut illersuusiornissaq pillugu Danmarkip saniatigut, Tuluit Nunaat, Polen, Tjekkialu oqaloqatigigitik.

Robert Gatesip taama oqaaseqarnera, Pituffimmi radareqarfimmik nutarterinermut tunngassuteqartoq, danskit illersornissaqarfiannit oqaaseqartitaq nutaarsiassaqartitsivimmi Ritzaumi issuarneqarpoq.

Pituffimmi amerikamiut radareqarfiata nutarterneqarnissaanik kalaallit danskit amerikamiullu Igalikumi siornaak 2004-imi isumaqatigiissuteqarput.

Isumaqatigissut pingasunik immikkoortortaqarpoq; illersornissamut 1951-imi isumaqatigiissutip nutarterneqarnissaanik, Nunatta USA-llu teknikkukkut aningaasaqarnikkulu suleqatigiinnissaannik kiisalu Pituffimmi sakkutooqqarfimmut avatangiisunut tunngasumik imaqarluni.

Isumaqatigiissut tunngavigalugu nunarput naalagaaffeqatigiinnermi namminersornerulersimasutut akuersaarneqarpoq Pituffimmulli atatillugu nammineerluni aalajangiisinnaatitaanani.

Pituffimmi radareqarfik USA-p illersornissaqarfiani qitiusumik inissisimaffeqarpoq, tassa qaammataasat atorlugit alapernaarsuinermut ilaagami.