Missilinut illersuusiornissaq USA-p Danmarkillu oqaloqatigiissutigaat

februaarip 11-at 2007 14:01

- Missilinut illersuusiornissap ineriartortinneqarnissaa pillugu USA-p Danmark oqaloqatigaa, oqaloqatigiinnerlu isumalluarnartumik ineriartorpoq, taama oqarpoq, USA-p illersornissamut ministeria Robert Gates, ministerit qinikkat aallartitat sakkutooqarnermillu suliaqartut nunanit assigiinngitsunit 40-neersut, sillimaniarneq pillugu Tysklandimi Münchenimi ataatsimeersuarneranni peqataasoq.

Robert Gates ataatsimeersuarnermi ullumi taama oqalugiarnermini oqarpoq missilinut illersuusiornissaq pillugu Danmarkip saniatigut, Tuluit Nunaat, Polen, Tjekkialu oqaloqatigigitik.

Robert Gatesip taama oqaaseqarnera, Pituffimmi radareqarfimmik nutarterinermut tunngassuteqartoq, danskit illersornissaqarfiannit oqaaseqartitaq nutaarsiassaqartitsivimmi Ritzaumi issuarneqarpoq.

Pituffimmi amerikamiut radareqarfiata nutarterneqarnissaanik kalaallit danskit amerikamiullu Igalikumi siornaak 2004-imi isumaqatigiissuteqarput.

Robert Gatesip oqaasii Sovjet Unioniusimasup massakkulli demokrati tunngavigulugu ingerlasup Ruslandip USA-llu akornanni silaannarmik nillernerulersitsipput, tassami Ruslandip præsidentia Vladimir Putin ataatsimeersuarnermi peqataasoq kissaammerpoq.

- Missilinut illersuusiorniarneq isumaliortaatsimut naleqqutinngilaq, uloriartorsiortitsilersinnaallunilu, taama pilersaaruteqartoqarnera pissutigalugu Rusland qinusaarneqartut misigisimavoq, Ruslandip præsidentia uparuaavoq, amerikamiullu nunarsuarmi naalagaannginnerat, nunarsuullu nunamik pisaanilissuarmik ataatsimik aqunneqannginnera erseqqissaatigalugu.

Vladimir Putinip taama isorinninnera, Robert Gatesip quigaa, Putinilu akillugu oqarluni - Aali sorsunneq nillertoq soraarsinniarlugu suleqataaniku, taama oqaaseqarnerpit qanga ullunik nuannersunik eqqaasipaannga.