Misissukkat inerneri: Coronavirusimik tunillatsissimasut suli marluinnaasut
Peqqinnissamut oqartussat coronavirusimut misissukkanit 13-init tallimanngornermi ullaap-tungaani akissutissarsipput.
Misissuinernit akissutit tamarmik ajunngitsut, nakorsaaneqarfimmi nakorsap, Paneeraq Noahsenip tusagassiortunik katersortitsinermi oqaatigaa.
- Taamaalilluta marluinnaat COVID-19-imik napparsimapput. Misissukkat taakku Nuumminngaanniiginnanngillat, sineriatsinninngaanneerlutillu aamma, Paneeraq Noahsen oqarpoq.
Misissorneqartut 51-it akissutersinissaminnut suli utaqqipput.
AAMMA ATUARUK Nuummi inerteqqutit nutaat: 1500 koruunimik akiligassinneqarsinnaavutit
Inuup allap coronavirusimik tunillatsissimananerata pingasunngornermi tusarliutigineqarnerata kingorna Nuuk pingasunngornermi nalunaaqutaq 16.00 matuvoq. Inuup taassuma sumi tunillatsissimanera ilisimaneqanngilaq - taanna illoqarfiit pingaarnersaanni tunillatsissimasinnaavoq - taamaammat allanik aamma tunillatsissimasoqarsinnaalluni. Tamannalu illoqarfiit pingaarnersaata matuneranut pissutaavoq.
Pisiniarfiit, nujaleriviit, atuarfiit ulluunerani paaqqinniffiit matupput - inuillu qulinit amerlanerusut silami illullu iluani katersuunnissaat inerteqqutaalerluni.
Politiit oqarnerat naapertorlugu inuit malittarisassanut nutaanut ataqqinninnginnerannut takussutissaqanngilaq.
- Innuttaasut malittarisassanut akuersorput. Pisuni ikittuinnarni pissutsit ilungersornarnerannik inunnut oqaaqqissaaruteqarpugut, politimesteri, Bjørn Tegner Bay oqarpoq.
Nuummi ima ilioqqusaanngilatit:
- Inuit amerlanerpaamik qulit ataatsimoorsinnaapput. Tamanna illup iluani silamilu atuuppoq. Tamanna maannamut 100-inut killeqarsimagaluarpoq.
- Inerteqquteqarneq pisortat ilaasartaataannut atuutinngilaq. Bussini issiavissat tamarmik atorneqarsinnaapput. Aamma pisiniarfinni inuit qulinit amerlanerusinnaapput.
- Ilinniarfeqarfiit ulluuneranilu paaqqinniffiit matupput. Atuarfiit tallimanngorpat aatsaat matusussaagaluarput – matusinerli ullumikkut sisamanit aallartissaaq.
- Nuuk Center matuvoq
- Qitigiartarfiit imerniartarfiillu matupput
- Neriniartarfiit aamma neriartortunut matoqqassapput. Taakkuli annissanik pisiniarfigineqarsinnaanissaat periarfissaassaaq.
- Timersortarfiit - matumani timigissartarfiit ilanngullugit matupput.
- Nuummiit aamma aallarsinnaanngilatit – aamma nammineq umiatsiannik. Aqisserniarsinnaavutit aalisariarsinnaallutillu – kisianni Nuummut angerlaqqittassaatit. Sumiiffinnut allamukaqqusaanngilluinnarputit.
- Pisiniarfiit ammaannassapput – pisinialli imminnut 2 meterinik ungasitsigisassapput.