Misissuisoqarnissaa piumasarivaat
Inatsisartunut ilaasortat Inatsisartut siulittaasuannit Ruth Heilmannimit sakkortuumik uparuarneqareersullu Lars-Emil Johansen aamma Kuupik Kleist taama oqarput.
Taasisitsinernik unioqqutitsisoqarsimassappat, tamanna inuit oqartussaaqataanerannik innarliinersoq, Lars-Emil Johansen ima akivoq:
- Ilaana, taamaaliorneq innarliinerujussuusimassaaq. Qinersinermi qinersut unneqqaserluttuliuutigineqarnerat. Tassa imaappoq: Ajortuliaq angisoorujussuuvoq, aamma soorunami demokratii eqqarsaatigalugu inuit qinigaat taasinerni eqqortunik kisitsisinnaanerat naatsorsuutigineqartariaqarpoq, Lars-Emil Johansen oqarpoq.
- Tamanna qanoq kinguneqartariaqassasoriviuk?
- Uanga isumaqarpunga iternga tikillugu tamanna misissorneqartariaqartoq, paasinarsippallu, inuillu ilaat ilisimasaqassappata, erseqqissumik qanga, kinalu qanoq iliorsimanersoq, taava iliuuseqarnissaq tassani nalilersorneqartariaqarpoq, Lars-Emil Johansen oqarpoq.
Taamatuttaaq Kuupik Kleist isumaqarpoq, TV-kkullu immiussat misissuataarneqarsinnaanissaat innersuussutigalugu:
- Amerlasoorsuunngilagut aamma kisinneqarsinnaavugut, pasilliuutigineqartutuullu pisoqarsimanersoq TV-kkut takuneqarsinnaavoq, kikkut sumi issianersut taasinersut taasinnginnersullunniit takuneqarsinnaagami. Soorunami taamaattoqarsimappat pissusissamisuunngilaq, ilumullu taamaattoqarsimanersoq ingerlaannaq takuneqarsinnaasoq erseqqissaassutigiinnassavara, Kuupik Kleist oqarpoq.
- Ilumut taamaattoqarsimassappat qanoq kinguneqassava?
- Naluara. Uanga oqaatigisinnaanngilara qanoq kinguneqartitsisoqasssanersoq, kisianni paasineqassappat taamaalisoqarsimasoq, taava qanoq kinguneqartinneqarnissaa eqqartorneqartariaqarpoq, Inuit Ataqatigiit siulittaasuat Kuupik Kleist oqarpoq.
Inatsisartut ukiakkut ataatsimiinneranni taasisitsisarnerit pillugit paasissutissat sukumiinerusut KNR-ip nutaarsiassaqartitsiviata piumasarivai, immiussat taasisitsinerillu inerneri piumasarineqarmata.
Inatsisartunut ilaasortat taasisitsinerni unioqqutitsisarsimasutut pasineqarnerat Qanoruumi unnugu sammineqarumaarpoq.
