Misissuisoqarnissaa piumasaraat

Qaanaami innuttaasut maannakkut akissutiserusullutik suliniaqatigiiffimmik pilersitsipput kalaallit, danskit Amerikamiullu sukumiisumik nassuiaassasut piumassaralugu, aamma timmisartorsuup nassataasalu peerneqarnissaat kiisalu uumasunik, pinngortitamik inunnillu ataavartumik misissuisoqarnissaa piumasaqaatasut, suliniaqataasup Uusaqqak Qujaukitsup Radioaviisimut oqaatigaa.

- Inuit 1968-ip kingornatigut eqqumiitsoruijussuarmik toqusarnerat akulikilliartorpoq, isikkamikkut ammartiterlutik. Tupinnarnerpaavorli toqusut ilaat amia tamarmi kajortorsuanngortarmat. Tamakkununnga tunngasut assigiinngitsorpassuit uagut paasisinnaanngisagut immikkut ilisimasalinnit misissorneqarnissaat piumasaraarput, Uusaqqak Qujaukitsup oqaatigaa, nangipporlu:

- Isertukujukkunnaarlutik uagutsinnut saqqumillutik tamaat suliarissagaat, isumannanngitsumillu avatangiiseqarnissarput anguneqassasoq neriuutigaarput. Uumassusillit attorneqarsinnaaput mingutsitsineq taakaniiginnassappat. Mingutsitsineq aamma aalannguussinnaagami immamiinnaanngitsoq ajoqusiisinnaassaaq, Uusaqqak Qujaukitsoq radioaviisimut oqarpoq.

Suliniaqatigiiffik januaarip 24-anni Qaanaarmiunik aggersaavoq, tassani oqallisigineqartut inaarutai ingerlateqqinneqarsinnaaniassammata.