Misissuisoq kukkorujussuarnerarpaat
Taamma nipilimmik nunatsinni pinaveersaartitsinermi suliaqartuniit Paarisamiit oqartoqarpoq, Danmarkimi Inuttut atukkatigut ilisimatusarfimmeersumut Else Christensen-imut akissuteqarluni arnat inuusuttut allaat quleriaammik amerlanerunerarlugit oqarneranut uparuaanerminni.
Nunatsinni Nakorsaaneqarfiup naatsorsuinerinut innersuussilluni, agguaqatigiissillugu ukiut tamaasa arnat 30-t piffissami 1991-imiit 2009-mut suli 18-iliitinnatik anaananngortartut Paarisap oqaatigaa.
Pinaveersaartitsisoqarfik naapertorlugu nunatsinni arnat inuusuttut 3 procentii ukiut tamaasa meerartaartarput. SFI-meersulli Else Christensenip tamanna allatorluinnaq naatsorsorsimavaa - tassa arnat 1000-it apersorneqarneranni paaserusussimagamiuk qanga meerartaaqqaarsimanersut - kisiannili tassa Paarisa isumaqarpoq, arnat pingajorarterutaasa 18-iliitinnatik meerartaartarneranut tunngatillugu taassuma kisitsisimanerata piviusoq tikeqqajarsimanngikkaa naqissuserneqarpoq.
Ilutigitillugu Paarisa isumaqarpoq, qallunaaq ilisimatooq taanna arnat inuusuttut akornanni pinaveersaartitsineq pillugu isornartorsiuinermini sukumiisumik nassuiaateqanngitsoq.
- Kommuneni pinaveersaartitsinermi siunnersortit, atuarfeqarfinni imaluunniit peqqinnissaqarfinni sulerisarnerat Else Christensen-ip misissorsimanngivippai. Taamaattumik nalunaarusiaq nuna tamakkerlugu suliniutinik qulaajaasuunngilaq, tamanna pisimavoq isumaginnittoqarfiup avataani, taamaattumillu uggornartuuvoq pissutsit piviusut ersersinneqanngimmata, Paarisami immikkoortortami pisortaq, Ella Skifte oqarpoq.
Meeqqat tamarmik oqaatigineqartartutuut angajoqqaanit kissaatigineqarlutik inunngortarnissaat taamalu inuunerminnik pitsaasumik aallartissinnaanissaat Peqqinissarfimmiit annertuumik isiginiarneqartoq Ella Skiftep ilanngullugu oqaatigaa.
