Misissuisitsinissaq Demokraatit iluarisimaarpaat
– Naalakkersuisut Ole Spiermann misissueqqullugu suliakersimammassuk ajunngilaq, tassanilu ersarissumik allaqqagami arlaatigut inatsisinik unioqqutiginnittoqarsimanersoq misissussagaa. Taamaammat uagut demokraatiniit naatsorsuutigivarput itisuumik misissorneqassasut. Taassuma saniatigut oqarsinnaavugut, Deloitte & Touche, naatsorsuuserisartut nunanit tamanit akuerisaanikut oqaatiginikuuaat Naalakkersuisut piaaralutik aningaasaqarnermut ataatsimiititaliamut paasissutissanik tunisisimanngitsut. Naalakkersuisutut akisussaaffimmut atatillugu inatsimmik unioqquginnittoqarsimanersoq aamma misissorneqartariaqarpoq. Tassami paasissutissat suliamut atatillugu soqutiginarsinnaasut tunniunneqartartussaapput, paasissutissalli tunniunneqarsimasut amigaateqarpallaaqaat, Demokraatit siulittaasuat Jens B. Frederiksen oqarpoq. Jens B. Frederiksen aamma oqarpoq Ole Spiermannip arlaannaannulluunniit attuumassuteqanngitsutut misissuisussanngortinneqarnera avoqqaarigaluarlugu, maannakkut toqqarneqarami pimoorussamik itisiliilluni misissuissasoq neriuutiginerarpaa.
