Misissuisitsineq Demokraatit apersuutigaat

Qasigiannguani efterskolissamut atatillugu arlaannaannulluunniit attuumassuteqanngitsumik misissuisitsineq Demokraatit siulittaasuata, Jens B. Frederiksenip, maanna tuavisaarutigaa, tamannami naalakkersuisut siulittaasuata ukiortaap missaani piariissasoq neriorsuutiginikuummagu.
Allattoq Louise M. Kleemann
februaarip 12-at 2009 08:17

Naalakkersuisut immikkut ittumik aningaasaliissutinik suliaqarnerannut oqallisaaqisumut apeqqutit pingasut akiniarneqartussaapput.

Immikkut ittumik aningaasaliissuteqarnermut atatillugu allaffissornikkut inatsisinik unioqqutitsisoqarsimanersoq, Ilisimatuup Ole Spiermannip misissuiffigaa, ilaatigut misissorneqartussaallutik allaffissornikkut inatsisinik unioqqutitsisoqarsimanersoq aamma naalakkersuisut Inatsisartut Siulittaasoqarfiat qinnuigigamikku Nunatta karsiata 2007-imut naatsorsuutaasa oqallisigineqarnissaat kinguarteqqugamikku inatsisinik tunngaviusunik unioqqutitsisimanersut – aamma inatsisinik unioqqutitsisoqarsimappat kikkut akisussaasuussanersut.

Maannalu tassa Demokraatit siulittaasuata aalajangiisoqarnissaa utaqqikatappaa. Taamaattumik Jens B. Frederiksenip naalakkersuisunut apeqqutigaa, misissuineq qaqugu naammassineqassanersoq aamma qaqugu avammut saqqummiuuneqassanersoq kiisalu misissuineq sooq kinguartoorsimanersoq. Taassuma naalakkersuisut akinissaminnut ullunik suliffiusunik qulinik piffissalerpai.

Kukkunersiuisartut Deloittekkut, kukkunersiuinerminnut atatillugu siorna oqaatigaat, naalakkersuisut aningaasaqarnermut ataatsimiititaliamut paasissutissanik piaaralutik isertuussisimasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq