Misissuisimaneq: Angutit inuusuttut imigassamik atueriaaseqartut amerlavallaarput
Imigassaq ikiaroornartullu pillugu Siunnersuisoqatigiinni siulitaasoq Inuk Bourup Nielsen taama oqarpoq.
Imigassamik atornerluinerup pinaveersaartinniarneqarnerani angutit pineqartut mininneqarsimapput, taakkuuppullu angutit kinguaassiornerup nalaani ukioqartut, atornerluinerallu meeraannut ingerlaqqittarlutik.
Inuiaqatigiit ataatsimut isigalugit, kinguariinnit kinguaariinnut ingerlatitseqqiisartut tassaapput, angutit taakkua peqqarniitsumik imigassamik atuisuusartut, taakkua peqqarniitsumik atuisuunerat meeraannut tuttarpoq, taamaanneralu eqqumaffigilernissaa pingaarutilerujussuusoq, Inuk Bourup Nielsen isumaqarpoq.
- Immaqa akuttugaluartumik imertarput kisianni sooq taamaarsuaq imertarnerat paasiniarutsigit isummersortittariaqassavagut, Inuk Bourup Nielsen oqarpoq.
Peqqarniitsumik imigassamik atueriaaseqartut amerlavallaarput, taakkulu inuiaqatigiinnut, peqqinnissaqarfimmut, inunnik isumaginnittoqarfinnut, inuttut misigissutsikkut tarnikkut assigiinngitsutigullu akisuallaarput, Inuk Bourup Nielsen oqarpoq,
Angutit inuusuttut imigassamik atornerluisut pinaveersaartinneqarnissaat, TV-ikkut oqallinnermi paasissutissiinikkullu ingerlanneqarnissaat kissaatiginartinneqarneruvoq, pineqartut ilinniarsimasuunatillu suliffeqanngimmata.