Misissuisarfissap ammarneqarnissaa kinguartinneqarpoq
Ilisimatusartut misissuisarfissaat Villum Research Station, Station Nordip nalaani inissisimassaaq, pisortatigoortumillu ullumi ataasingornermi ammarneqartussaagaluarluni.
Danmarkip silap pissusianut ministeria Rasmus Helveg Petersen misissuisarfimmik ammaasussaagaluarpoq, allunaasaq kipisussaagaluaramiuk. Aarhus Universitetip siulersuisuisa siulittaasuat Michael Christensen, Villum Fondenillu pisortaanera Lars Hansen, Issittumilu Sakkutooqarfiup pisortaa, sakkutuut naalagaat Stig Ø. Nielsen ammaanersiornermi peqataasussaagaluarput.
Aamma atuaruk Nunatsinni Ilisimatusarfiit avannarpasinnersaat atoqqaarfissiuleraat
Kalaallit Nunaannili silap pissusia ammaanersiornissap kinguartinneqarneranik Kastrupimilu suliumajunnaartoqarnera ilaatigut pissutaalluni ammaanersiornermi ataqqinaamik peqataasussat tikissinnaasimanngillat. SAS-imi inuttat suliumajunnaarnerat pissutaalluni Danmarkimiit peqataasussat Danmarkimit tikissinnaasimanngillat, aallaqqaammut Svalbardiliartussaagaluaramik, tassanngaanniillu Tunup avannaarsuanukartussaagaluarlutik.
Issittumi Sakkutooqarfiup pisortaa Stig Ø. Nielsen Siriuspatruljep qitiusumik Daneborgimi angerlarsimaffianni silapilunnera pissutaalluni aamma uninngavoq. Tamaani anorlerlunilu erseqqarluppoq, timmisartuallu Twin Otteri timmisinnaanani.
Sila aqagu ajussanngippat, suliumajunnaarnerillu aaqqiivigineqarsimassappata taava Villum Research Station pisortatigoortumik aqagu marlunngornermi ammarneqarumaartoq nalunaarutigineqarpoq.